Duro: Fatkeqësi që nuk do luajmë në Vlorë
"Keqardhje që s'jemi para tifozëve, pres shumë nga sulmuesit"
Flamurtari pret sot Lushnjën për javën e dytë të kampionatit, në një ndeshje që do të zhvillohet në stadiumin "Adush Muça" të Ballshit për shkak të problemeve që ka fusha e impiantit të Vlorës. Trajneri Shpëtim Duro e cilëson si fatkeqësi zhvillimin e takimit në fushë asnjanëse dhe jo në shtëpi. Dje, në një konferencë për shtyp, Duro theksoi se luajtja e ndeshjes në Ballsh nuk është pozitive, por, sipas tij, Flamurtari është i dënuar të marrë tri pikë. "Fatkeqësisht, nuk do të luajmë në Vlorë kundër Lushnjës. Kjo nuk është diçka pozitive për ne. Por, pavarësisht se jemi të kushtëzuar nga fusha, na duhet që të japim maksimumin për këtë ndeshje", ka thënë fillimisht Duro. KUNDËRSHTARI Trajneri e vlerëson maksimalisht Lushnjën, edhe pse për opinionin ky kundërshtar shihet si i destinuar për të zbritur nga Superiorja. Sipas Duros, serioziteti për të dhënë më të mirën është parësor në këtë ndeshje. "Çdo kundërshtar do ta vlerësojmë maksimalisht. Të gjitha skuadrat për ne nuk kanë dallime. E njëjta gjë vlen edhe për ndeshjen e radhës me Lushnjën. Lojtarët duhet të japin maksimumin dhe dua të theksoj se serioziteti për të dhënë më të mirën është parësor si në këtë ndeshje, ashtu edhe në të tjerat që do të vijnë. E respektojmë kundërshtarin, duke kërkuar fitoren", theksoi trajneri kuqezi. PRITSHMËRITË
Duro është i kënaqur që ka një skuadër me cilësi dhe bën të ditur se ka shumë besim te lojtarët. Trajneri i Flamurtarit pret më shumë nga sulmuesit, por edhe çdo repart tjetër. "Ne jemi një skuadër që edhe në ndeshjen e parë në Korçë
mendoj se bëmë mirë, pavarësisht rezultatit. Luajtëm me një skuadër të rëndësishme dhe treguam që kemi cilësi, por edhe autoritet. Në këto kushte, dua që të theksoj se pres maksimumin nga të gjithë futbollistët ndaj Lushnjës. Të gjithë lojtarët që kam në ekip janë të rëndësishëm. Po ashtu, siç e kam thënë, kërkoj më shumë nga sulmuesit. Ata duhet ta tregojnë këtë për shkak edhe të besimit që unë kam. Pres më të mirën nga të gjitha repartet", përfundoi Duro. Ndërkohë, nuk është hera e parë që Flamurtari luan në fushën asnjanëse të Ballshit. Dy vite më parë, kuqezinjtë pritën Tërbunin në "Adush Muça", duke arritur një fitore tenistike me shifrat 80. Pas humbjes në start me Skënderbeun, sot drejtuesit e klubit vlonjat presin autokritikën nga lojtarët, duke arritur fitore bindëse me Lushnjën.