Muzaka: Favoritë ishim vetëm me Sant Hulian, goli i dytë na shokoi
Mesfushori flet edhe për rolin: Aktivizimi në qendër, i diskutueshëm
Mesfushori i Skënderbeut, Gjergji Muzaka, ishte autori i golit të vetëm që korçarët realizuan në ndeshjen e së enjtes në Kiev përballë Dinamos. Në një intervistë të dhënë për "Supersport", tiranasi foli për humbjen e skuadrës, rolin e tij në qendër të mesfushës, si dhe pikën më të fortë të bardhekuqve. Fillimisht ai komentoi përmbysjen e rezultatit në një moment të papritur për Skënderbeun në pjesën e dytë. "E dinim që kundërshtari do të administronte rezultatin në momentin që pësuam dy gola. Goli i parë që pësuam ishte i pashmangshëm, nga një distancë e largët. Më pas erdhi edhe goli i dytë dhe loja mori një rrjedhë tjetër", ka thënë Muzaka, i cili përshkroi edhe momentin e golit që realizoi në fundin e pjesës së parë. "Iu afrova portës dhe mendova ta gjuaja, pasi pashë hapësirën. Ndoshta u krijua pak hapësirë nga fakti se mbrojtësi kundërshtar mendoi se do të pasoja. Pikërisht për të shmangur ndërhyrjen e mbrojtësit që kishte mundësi për të më zënë rrezen e portës, godita me teknikë dhe jo fort".
ROLI I RI - Daja e ka "zbuluar" Muzakën edhe në rolin e një mesfushori qendre, duke u mbështetur tek eksperienca që ka. Lojtari nuk ka zhgënjyer, madje ka tejkaluar pritshmëritë me prezantimin e tij këtë edicion në Ligën e Europës. "I diskutueshëm është edhe ky pozicioni im në fushë. Por, ky rol që më ka caktuar trajneri ka të bëjë edhe me eksperiencën që unë kam në futboll. Mendoj se trajneri e ka menduar drejt këtë vendim për të më luajtur në qendër të mesfushës".
PIKA E FORTË - Për Muzakën, Skënderbeu ka qenë gjithnjë jofavorit në ndeshjet që ka luajtur, duke përjashtuar këtë vetëm sfidat me amatorët e Sant Hulias nga Andorra. "Arma kryesore e Skënderbeut ka qenë fryma e grupit. Përveç raundit të parë ku kishim një ekip të dobët, ndaj çdo kundërshtari në turet paraeliminatore të Ligës së Europës, ne nuk ishim favoritë. Por, ka ndikuar fryma e grupit dhe eksperienca e lojtarëve që ka Skënderbeu për të arritur deri këtu", bëri të ditur mesfushori, i cili shpesh i ka nisur ndeshjet nga stoli, por ai nuk bën polemika për zgjedhjet e trajnerit Daja. "Pavarësisht minutave që aktivizohesh, si për 90 minuta apo për 1 minutë, mjafton të japësh maksimumin", përfundoi autori i golit të Skënderbeut në Kiev.