Plaku mund të mungojë, ka "gjyq" në... Poloni
Sebino Plaku mund të jetë mungesa e madhe e Kamzës në ndeshjen e së hënës kundër Skënderbeut. "Panorama Sport" mëson se sulmuesi është thirrur për një çështje të hapur nga Federata e Futbollit të Polonisë, për shkak të një padie që ka bërë ndaj ish-skuadrës së tij, Slask Vroklav. Pak kohë më parë, Plaku fitoi gjyqin me klubin polak, duke përfituar 200 mijë euro dëmshpërblim. Sot, sulmuesi pritet të vendosë përfundimisht nëse të hënën do të udhëtojë drejt Varshavës apo do të qëndrojë në Tiranë për të luajtur kundër ish- skuadrës së tij, Skënderbeut. Plaku është një futbollist shumë i rëndësishëm për Kamzën, teksa drejtuesit i kanë dhënë edhe shiritin e kapitenit të ekipit. Zhbllokimi i tij dhe lojtarit tjetër në repartin ofensiv, Stevan Raçiç, në ndeshjen e Kupës së Shqipërisë ndaj Ilirisë ishte një ogur i mirë për skuadrën në prag të sfidës me Skënderbeun. "Jam në rrugë e sipër të një gjyqi tjetër për të marrë dëmshpërblim për prishjen e karrierës që më ka shkaktuar trajtimi i bërë nga klubi i Slask. Do të jetë një gjyq në Federatën Polake që do të vendosë se sa do të jetë dëmshpërblimi në përputhje me ndikimin që ka pasur sjellja e Slaskut në karrierën time", pat thënë Plaku pak kohë më parë për gazetën, pikërisht kur Federata Polake i kishte dhënë të drejtë atij për prishjen e kontratës me Slaskun. Sulmuesi u trajtua në mënyrë çnjerëzore nga klubi polak, por fitoi të drejtën e tij, pasi Federata detyroi Slaskun të dëmshpërblente Plakun me 200 mijë euro.