Kampionati Ballkanik nis vetëm me humbje për kuqezinjtë
"Beach volley"/ Qyteti i Durrësit është pritës i aktivitetit
Ka nisur dje Kampionati Ballkanik i "Beach Volley", aktivitet që po zhvillohet në plazhin e Kavalishencës, në Durrës dhe që organizohet nga Federata Shqiptare e Volejbollit (FSHV). Në këtë aktivitet, marrin pjesë 12 çifte për vajza, ndërkohë që pas shortit të hedhur, pjesëmarrësit janë ndarë në 4 grupe me nga 3 çifte secili. Dje janë luajtur ndeshjet e para në grupe (nga dy takime për secilin grup), duke përcaktuar edhe pretendentët e parë për fitimin e këtij turneu. Ndërsa sot paradite do të luhen ndeshjet e mbetura të fazës së grupeve për femra dhe më pas takimet çerekfinale. Një aktivitet që po dhuron mjaft emocione dhe rivalitet, teksa nuk mungojnë edhe sportdashësit e shumtë. Gjithashtu, gjatë ditës së djeshme, janë luajtur ndeshjet e dy raundeve të para për meshkuj me pjesëmarrjen e 16 çifteve. Përveç çifteve nga Rajoni, marrin pjesë edhe sportistë nga Izraeli e Zvicra, duke qenë se ky event është pjesë e "CEV Contiental Cup", ndaj dhe aktiviteti është mjaft i rëndësishëm dhe me pjesëmarrje të gjerë. Gjithçka në këtë ditë të parë është zhvilluar normalisht, me mjaft ndeshje që treguan rivalitet dhe grintë mes sportistëve, ndërkohë që edhe organizimi i FSHV- së ka qenë mjaft i mirë. Në ditën e parë duetet kuqezi kanë njohur vetëm humbje dhe vetëm një set të fituar. Sot do të luhen takimet e tjera për meshkuj, që vlejnë për renditje dhe fazën çerekfinale. Për vitin tjetër, Shqipëria ka fituar të drejtën e organizimit të finaleve të Europianit U-19 për vajza, një event i rëndësishëm i Federatës Europiane, e cila ia ka besuar këtë detyrë FSHV-së. "Për ne ky është një event i rëndësishëm dhe fakti që CEV na e ka besuar tregon për besimin që ky institucion ka karshi nesh. Ne duam të përgatitemi mirë për këtë event, të bëjmë një paraqitje dinjitoze dhe për këtë kërkojmë mbështetjen e të gjithëve, ashtu siç kemi punuar deri më tani", u shpreh pak ditë më parë presidenti Erlind Pëllumbi.