Ajeti i pafat, dëmtohet në një ditë fantastike
Mbrojtësi shqiptar më i miri te Krotone, vlerësohet me 7
Paraqitje spektakolare për sa kohë ishte në fushë, edhe pse përballë kishte zikaltrit e Interit të kryesuar nga Ikardi. Arlind Ajeti është rikthyer edhe një herë në fushën e lojës që të jetë vendimtar, mirëpo për fat të keq një dëmtim muskulor bëri që të linte fushën e lojës pa mbaruar sfida. Lajm që bën trajnerin e kuqezinjve me "dhimbje koke" para sfidës me Spanjën.
DËMTIMI
Arlind Ajeti mban në ankth Kristian Panuçin. Mbrojtësi i përfaqësueses shqiptare është dëmtuar dje në sfidën mes Krotones dhe Interit duke lënë para kohe fushën e lojës, për t'i krijuar jo pak probleme teknikut të përfaqësueses vetëm dy javë para grumbullimit. Arlind Ajeti zhvilloi një ndeshje shumë të mirë, duke u treguar vendimtar me ndërhyrjet e tij në disa momente të ndeshjes, për të ndalur Zhoao Marion dhe Ikardin që i drejtoheshin portës së Krotones. Por në minutën e 64- t të ndeshjes ai kërkoi ndihmën e stafit mjekësor dhe më pas la fushën e lojës, duke u zëvendësuar nga trajneri Nikola. Një dëmtim muskulor bëri që shqiptari të mos ishte në gjendje për të vijuar takimin dhe stafi i skuadrës italiane vendosi që të linte menjëherë lojën. Në ditët në vijim, do të bëhet me dije edhe shkalla e dëmtimit. Duke llogaritur që në ndeshjen e radhës të Kombëtares, kundër Spanjës, mungon për kartonë të verdhë edhe Mërgim Mavraj, dëmtimi i Ajetit mund të detyrojë Panuçin të rindërtojë plotësisht qendrën e prapavijës në krahasim me dy ndeshjet e kaluara. Tani duhen pritur vizitat më të specializuara gjatë ditëve në vijim për mbrojtësin e Kombëtares, me shpresën që ndalesa e tij të mos jetë aq e gjatë dhe ai të kthehet në dispozicion
të skuadrës për dy duelet e tetorit.
NOTA
Për sa kohë shqiptari ishte në fushë, Interi nuk ia doli që të rrezikojë Krotonen. Mirëpo, me daljen e tij, loja ndryshoi dhe zikaltrit triumfuan me dy gola. Mediat italiane e kanë cilësuar si "bishë" qendërmbrojtësin kuqezi. "Sportmediaset" e vlerëson me 6.5 dhe shkruan: "Dorëzohet për shqetësime fizike pas një sfide të luftuar si ' bishë'. Me paraqitjen e tij anulon praninë e Mauro Ikardit në majën e sulmit të Interit". Ndërkohë që "Calciomerkato. com" e ka vlerësuar me notën 7 duke e cilësuar si lojtarin më të mirë. "Mur i vështirë për t'u kapërcyer, me Ikardin që praktikisht shtypet nga loja e mbrojtësit shqiptar. Një problem fizik i prish pasditen e lavdishme".