Klubi pezullon Mirakën dhe Nunez
Pas ngjarjeve të djeshme në ndeshjen Luftëtari-Kamza, klubi gjirokastrit ka reaguar menjëherë, duke pezulluar pa afat portierin Festim Miraka dhe sulmuesin Fabricio Nunes. Në një reagim në faqen zyrtare në "Facebook" në orët e mbrëmjes, klubi bluzi shkruan: "Klubi i futbollit Luftëtari, duke parë zhvillimet në takimin Luftëtari-Kamza, për sjellje të dhunshme në fushën e lojës si dhe për sjellje të dhunshme ndaj shokëve në dhomat e zhveshjes, ka vendosur të gjobisë dhe pezullojë pa afat nga skuadra futbollistin Festim Miraka. Gjithashtu, lojtari Fabrizio Nunes, për reagim ndaj zëvendësimit dhe fyerje të trajnerit, është ndëshkuar me gjobë dhe është pezulluar pa afat nga skuadra. Klubi i futbollit Luftëtari bën me dije se në ditët në vijim do të ketë të tjera zhvillime në skuadër. Luftëtari nuk toleron askënd që të nëpërkëmbë emrin e tij. Shumë shpejt, skuadra do të rikthehet aty ku i takon", shkruhej në njoftimin e djeshëm të klubit bluzi. Një humbje që ka shkaktuar "tërmet" në Gjirokastër me pezullimin e dy lojtarëve. Ashtu siç parashikon klubi, në vazhdim pritet të ketë zhvillime. Luftëtari pësoi dje humbjen e parë në fushën e vet për këtë kampionat.