Tomori, frikë nga gjykimet
Mersini: Nëse nuk ndikojnë arbitrat, fitojmë me Turbinën, na duhen pikët
Futbollisti i Tomorit, Endri Mersini, ka bindjen e plotë se skuadra e tij do të reagojë pozitivisht pas humbjes me Shkumbinin, duke kërkuar rikthimin te fitorja në fundjavë me Turbinën. Edhe pse në këtë sfidë ka disa mungesa të rëndësishme për shkak të pezullimeve që janë bërë nga klubi beratas në drejtim të disa lojtarëve, përsëri optimizmi dhe besimi ngelet i lartë. MERSINI
Në një prononcim për "Panorama Sport", 23-vjeçari me origjinë nga Gjirokastra, është shprehur se kjo përballje do të jetë delikate, por jo e pamundur për t'ia dalë. "Jemi të vetëdijshëm që këtë fundjavë
kemi një ndeshje delikate, pasi vijmë fill pas humbjes me Shkumbinin dhe normalisht që do të na duhet të kërkojmë medoemos rikthimin te pikët e plota. Ndaj Turbinës, rezultati është jashtëzakonisht i rëndësishëm, ku në këtë mënyrë do të na afronte sa më pranë kreut duke mos krijuar një distancë të madhe pikësh me rivalët tanë. Asgjë nuk është e lehtë në këtë përballje, mirëpo jemi të bindur për të bërë më të mirën tonë. Skuadra po kalon një formë shumë të mirë fizike dhe për këtë jemi të kënaqur. Humbja me Shkumbinin nuk duhet të ndodhte pasi ishim në momentin tonë më të mirë, gjithsesi në futboll ndodhin gjëra të tilla dhe ndonjëherë fati është totalisht kundër teje. Megjithatë, fokusi ynë tashmë është te Turbina, teksa besojmë që do të marrim maksimumin nëse në këtë përballje nuk do të ndikojë arbitri. E kemi studiuar kundërshtarin në fjalë dhe kam besim se do ta surprizojmë", tha fillimisht Mersini. I pyetur në lidhje me një koment të mundshëm në lidhje me të pezulluarit në
radhët e beratasve, 23-vjeçari ka thënë: "Është diçka që nuk më takon mua, por do të ishte mirë që këta futbollistë t'i kishim në dispozicion për këtë sfidë. Megjithatë, këto janë vendimet e klubit dhe çdo i tillë duhet respektuar", përfundoi Mersini.