Transfertë "ferri" për Kastriotin, Karakaçi: E di unë si fitojmë

Kastrioti po vijon përgatitjet për ndeshjen e radhës atë ndaj Tërbunit, e cila është një sfidë mjaft e rëndësishme për krutanët, të cilët do të kërkojnë tri pikët edhe në këtë ndeshje për të vijuar të jenë ata "mbretërit" e Grupit A, të cilin e kryesojnë me meritë në tri takimet e para, pasi kanë marrë pikë të plota. Ky takim është specifik edhe për trajnerin Samuel Nikaj, i cili ka drejtuar në të shkuarën skuadrën pukjane për 8 ndeshje. Por jo vetëm trajneri, pasi edhe disa futbollistë të Kastriotit të këtij sezoni kanë luajtur më përpara për Tërbunin, ata janë Klajdi Kuka, Vilson Lila, Sokol Mziu, Xhynejt Çutra, Taulant Marku, Enco Malindi, si edhe Abaz Karakaçi. Ky i fundit, në një prononcim për gazetën, flet për ecurinë e deritanishme, por edhe për sfidën me pukjanët, të cilën ai e cilëson si mjaft specifike. "Jemi të kënaqur me ecurinë e deritanishme, por kemi shumë për të bërë. Sa i takon ndeshjes së radhës, ajo është me një specifikë të veçantë, pasi te Kastrioti ka shumë ish-ë, duke filluar nga trajneri e deri tek unë, prandaj do jetë një ndeshje e bukur për t'u parë e shijuar. Shpresoj të jetë ndeshje "Fair-Play" dhe të fitojë më i miri", tha Karakaçi. Liridon Pasha