Europiani i të rinjve, Durrësi “mban frymën”
Vijojnë me intensitet të lartë përgatitjet në kuadër të Kampionatit Europian për të rinj&U23 që do të mbahet në Durrës nga data 15 deri më 22 tetor. Pallati i sportit "Ramazan Njala" është kthyer në një kantier, ku po punohet në të gjitha drejtimet. Palestra e peshëngritjes thuajse është rinovuar tërësisht me parket dhe mjetet ndihmëse. Tualetet, sauna, pedanat, tavolinat dhe gjithçka tjetër e nevojshme po montohen me shpejtësi për të qenë gati deri të shtunën, kur edhe do të bëhet ceremonia hapëse. Zyrtarët më të lartë të FSHP-së, madje deri te presidenti Elez Gjoza kanë përveshur mëngët dhe po punojnë edhe vetë për të pasur çdo gjë gati. Teknikët provojnë vazhdimisht pedanat, shtangat, sinjalistikën, në mënyrë që të përmbushin standardet e duhura. Ekipet e para, bashkë me sportistët respektivë, kanë filluar të vijnë disa ditë më herët. Është një numër mjaft i madh i tyre dhe të gjithë bashkë do të akomodohen në dy hotele në periferi të Durrësit. Atje u janë krijuar të gjitha kushtet, duke filluar nga dhomat, ushqimi e gjithçka tjetër, përfshirë këtu edhe palestrat me një numër shumë të madh pedanash. Pallati i sportit ka marrë pamje tjetër dhe duket se shumë shpejt do të jetë gati për ceremoninë hapëse të orës 17:00 të ditës së shtunë dhe, më pas, për fillimin e aktivitetit të dielën në mesditë. Roland Gjini