Arturo Vidal mohon largimin nga Kili
Pas zërave se deklaratat e Arturo Vidal mbi eliminimin e Kilit nga Kupa e Botës u lidhën me një largim të tijin nga kombëtarja, vetë mesfushori kilian ka deklaruar sot, gjatë një mesazhi për fansat, se rrugëtimi i tij me kombëtaren do të vazhdojë. Dy ditë më parë, Vidal postoi një mesazh në faqen e tij zyrtare të "Twitter", ku shkruante se: "Falënderoj të gjithë ata që na kanë mbështetur në gjithë këto vite.", mesazh, i cili ka nënkuptuar një largim të tijin nga kombëtarja kiliane. Mirëpo, gjatë ditë së djeshme, Arturo Vidal ka dashur të qartësojë lidhur me këto zëra duke shkruar: "Jemi të mërzitur që nuk kemi arritur objektivin tonë në eliminatoret e Kupës së Botës, edhe pas gjithë përpjekjeve të bëra. Udhëtuam mijëra kilometra duke lënë vetëm familjet tona për të dhënë maksimumin tonë, ku pas dhjetë vitesh kemi dështuar të arrijmë kualifikimin tonë për në Kupën e Botës. Mund të jetë e vështirë për t'u kapërcyer, por nuk është fundi. Së bashku do të ringrihemi edhe më të fuqishëm se më parë. Ne nuk shuhemi kurrë, jemi luftëtarët e Kilit. Do të shihemi në sfidat e radhës."