Përmbyset situata, fitohet më lehtë në transfertë

Kategoria Superiore/ Bie miti “skuadër fushe” në këtë sezon

Opinioni sportiv në Shqipëri për shumë vite me radhë u brumos me mitin "skuadër fushe", pasi në disa stadiume skuadrat mike e kishin të pamundur që të korrnin sukses. Por, në dy sezonet e fundit situata është përmbysur në Kategorinë Superiore, aq më shumë në këtë fillim edicioni, ku fitoret e arritura në pesë javë kampionat janë më të shumta për ekipet mike sesa vendaset. Në 25 ndeshjet e zhvilluara në Superiore për këtë sezon, 9 fitore i kanë marrë skuadrat që kanë luajtur në transfertë, 8 fitore për skuadrat pritëse, ndërsa 8 ndeshje të tjera janë mbyllur në barazim, ku pa dyshim kjo për meritë të skuadrave që kanë qenë udhëtuese. Aktualisht Superiorja ofron një futboll të hapur dhe me një infrastrukturë të përmirësuar çdo ekip i ka mundësitë që të marrë rezultat, pavarësisht statusit, pritës apo mik. Bilanci i këtyre pesë javëve të para tregon se, nëse ke ekip të përgatitur, mund të marrësh rezultat në çdo fushë. Madje, transfertat kanë qenë më fatsjellëse për ekipet sesa ndeshjet që kanë organizuar si pritëse. Surprizat nisën që në start, ku Laçi i dha goditjen e parë Partizanit në shtëpi, i cili vinte si favorit absolut. Në kryeqytet edhe Lushnja arriti t'i merrte një pikë Partizanit, ndërsa Skënderbeu e nisi shkëputjen me Kukësin, pikërisht nga fitorja që mori në stadiumin "Zeqir Ymeri". Java e pestë është treguesi më i mirë i thyerjes së mitit "skuadër fushe", pasi në pesë ndeshjet e luajtura, tri fitore i morën skuadrat udhëtuese, Kukësi, Partizani dhe Kamza, ndërsa Flamurtari mori pikë në Shkodër. Skënderbeu mbeti ekipi i vetëm që ruajti të paprekur nderin e skuadrës pritëse, ndonëse me fat arriti të fitonte 2-1 ndaj Laçit. Këto tregues lënë të kuptosh se Superiorja e këtij sezoni do të dhurojë plot të papritura dhe thyerje tabush.