“Punëtori” Hysaj sfidon Romën, Napoli kërkon të tetën radhazi
Mbrojtësi i djathtë, titullar në kryeqytet
Elseid Hysaj është një makineri, sepse ai është një nga futbollistët që nuk ka nevojë të pushojë kurrë dhe ofron gjithmonë një rendiment të lartë. Për këtë arsye, trajneri Mauricio Sarri e ka "përqafuar" me mall mbrojtësin e djathtë shqiptar, i cili dihet se tashmë është një nga titullarët e pazëvendësueshëm të të kaltërve. Skuadra e Napolit do të udhëtojë sot në mbrëmje në Romë, ku e pret një duel mjaft i vështirë dhe i rëndësishëm, me Napolin që do të kërkojë të marrë të tetën fitore radhazi. Hysaj dhe shokët e tij janë stërvitur për dy ditë dhe në këto seanca është vënë re se trajneri Mauricio Sarri do ta përqendrojë lojën e tij në korsinë e djathtë, ku Hysaj dhe Kajehon formojnë së bashku një nga "zinxhirët" më të sigurt të Serisë A, duke lejuar pak sulme nga ana e tyre, por duke qenë gjithashtu dyshja dhe një nga korsitë më të nxehta të kampionatit. Edhe pse ndoshta loja e tij nuk tërheq shumë syrin e atyre që vlerësojnë futbollin e bukur, në sytë e Sarrit, Elseid Hysaj është "punëtori i palodhshëm", që çdo trajner do të donte ta kishte në skuadrën e tij. Jo më kot, trajneri aktual i Napolit, i cili e vlerësoi dhe i dha besim që tek Empoli, e mori me vete në "San Paolo". Prandaj, si shkodrani, ashtu sikurse pjesa tjetër
e skuadrës, janë të gjithë të thirrur në apel për të mos e ndalur sprintin e tyre, as sot në mbrëmje në "Olimpikon" e Romës, një test nga i cili nëse dilet me tri pikë, atëherë realisht që Napoli do të bëjë të dridhen të gjitha pretendentet e tjera për titull, qoftë edhe Juventusin kampion në fuqi.