“Euro 2019”, Shqipëria mëson rivalët

Kombëtaret kuqezi rikthehen pas 5 dhe 6 viteve mungesë

Pas pjesëmarrjeve për të dytin edicion radhazi në Ligën Ballkanike me të dy kombëtaret femra dhe meshkuj, Shqipëria ka konfirmuar garimin e saj në një tjetër event ndërkombëtar, edhe më të rëndësishëm. Në Luksemburg është hedhur shorti i Kampionatit Europian të volejbollit për meshkuj e femra, "Eurovolley 2019". Sikurse ishte premtuar, përfaqësueset kuqezi rikthehen pas një mungese të gjatë ( pesë vite të rriturit dhe 6 të rriturat) dhe do të luajnë në fazën eliminatore me të dyja ekipet e saj, meshkuj e femra. Ndeshjet eliminatore do të nisin në gusht të vitit 2018, ndërkohë që është mësuar shorti për të dyja ekipet kombëtare. Ekipi i djemve është pozicionuar në Grupin D, së bashku me Portugalinë, Kroacinë e Austrinë. Ndërsa ekipi i vajzave është pozicionuar në Grupin B, së bashku me Kroacinë, Zvicrën dhe Austrinë. Në një deklaratë për shtyp, Federata Shqiptare e Volejbollit u shpreh se do të vijojë mbështetjen e saj për ekipet kombëtare të të gjitha moshave, duke shpresuar që paraqitja e mirë në Ligën e Europës të këtij viti të pasohet me një tjetër paraqitje pozitive edhe në Europian, për të promovuar vlerat e volejbollit shqiptar. Ky është një tjetër lajm i mirë për dashamirësit e volejbollit shqiptar pas "OK"-it që mori pak kohë më parë nga Federata Europiane e Volejbollit ( CEV) për të organizuar fazën finale të Kampionatit Europian të Moshës U- 19 për femra ( viti 2018). Kujtojmë se faza finale e Europianit U-19 për femra do të zhvillohet më datat 1- 9 shtator të vitit të ardhshëm.