Orges Shehi në katedër, korçarët e bëjnë “Doktor”
“Honoris Causa” për portierin, vlerësohet edhe presidenti
‘‘ Orges Shehi, 40 vjeç, kapiten i Skënderbeut". Kështu u hap seminari për dekorimin "Doctor Honoris Causa" për "gardianin" durrsak të Skënderbeut. Ceremonia madhështore u zhvillua dje në mesditë, në Korçë, ku, përveç dekorimit të Orges Shehit, edhe presidenti i klubit, Ardjan Takaj, është nderuar me certifikatë mirënjohjeje. Në ambientet e universitetit "Fan S. Noli" të Korçës, personalitete të shumtë, drejtues të universitetit, dekanë, e gjithë skuadra korçare, presidenca, tifozë, miq dhe të afërm të Shehit e shumë të tjerë i ka mbledhur kapiteni i Skënderbeut, për të cilin u zhvillua një ceremoni e veçantë. Shehi është futbollisti i vetëm shqiptar që ka mundur të marrë një titull të lartë, siç është ai i "Doktor Honoris Causa". Ceremonia e titullit që ka marrë Shehi ka zgjatur më shumë se 30 minuta, ndërkohë që nuk kanë munguar së reshturi duartrokitjet e të gjithë të pranishëmve që e kishin mbushur amfiteatrin e universitetit.
"Kam fituar shumë e shumë trofe, sa ndeshje kam luajtur deri tani që i kam kaluar të 40-at, por kjo e sotmja ( djeshmja) është vërtet ' qershia mbi tortë'". Kjo ka qenë fjalia më domethënëse që ka thënë dje Shehi gjatë ceremonisë. Surpriza tjetër e madhe e kësaj ceremonie ka qenë edhe ajo e certifikatës së mirënjohjes që ka marrë presidenti Ardjan Takaj, trofe i shoqëruar edhe me pllakatën e argjendtë.
DOKUMENTARI- Gjithçka nisi me një dokumentar që fliste për Orges Shehin. Ky dokumentar ishte përgatitur nga UEFA, e cila kishte zgjedhur si lojtarin më të veçantë kapitenin e Skënderbeut. Shehi është futbollisti i vetëm 40-vjeçar që luan në Europa League. Përpara fillimit të dokumentarit është paraqitur edhe një CV e pasur e Shehit, si futbollist me 663 ndeshje mbi supe, si askush tjetër në Shqipëri. Me mbi 50 ndeshje në arenën europiane për klube, edhe ky një rekord i durrsakut. 6 tituj kampionë dhe 2 Superkupa ka fituar Shehi me Skënderbeun, të cilat e bëjnë një legjendë të futbollit shqiptar.
GJERGJI MERO- Pas dokumentarit, e mori fjalën ishrektori, sot dekan i Fakultetit të Bujqësisë, por tifoz i zjarrtë i Skënderbeut, Gjergji Mero: "Faleminderit të gjithëve për respektin që treguat për Shehin dhe njëkohësisht edhe universitetin e Korçës. Falënderoj ata pedagogë, studentë, sportistë, të cilët e kanë mirëpritur këtë titull që ne po i japim Shehit dhe me plot gojë sot e themi që Shehi na kë bërë vërtet krenarë. Vetëm ne korçarëve na shkon ta themi atë fjalinë tonë shumë domethënëse dhe ta këndojmë: 'Të dija të vogël, ti më ishe 40 vjeç', e cila i shkon për shtat vetëm Shehit. Krenohemi të gjithë që kemi midis nesh, në skuadrën e qytetit tonë, një figurë kaq të madhe si Orgesi. Gjithsesi, ky titull nuk i jepet vetëm Shehit, por gjithë Skënderbeut, madje në mënyrë të veçantë presidentit Ardjan Takaj që e kemi midis nesh. Shehi, për të gjithë, është një sportist shembullor, komunikues me të gjithë, familjar i shkëlqyer. Ajo që dua të zbuloj për Shehin është se vetë kapiteni ka premtuar që do ta mbështesë universitetin në ngritjen e ekipit të futbollit të universitetit dhe për këtë e falënderojmë pa fund. Qofsh i nderuar Gesi!".
KRYEBASHKIAKU- Më pas, fjalën e ka marrë kryetari i Bashkisë së Korçës, Sotiraq Filo, i cili u shpreh: "Është kënaqësi që përshëndes në mes të kësaj salle, me kaq emra të mëdhenj. Mund të duket e jashtëzakonshme për universitetin 'Fan S. Noli' që po jep këtë titull, por nuk është aspak e tillë, pasi vetë Shehi e ka merituar. E rëndësishme është që Shehi edhe sot është aktiv, ndërkohë që ju them me bindje se ai ' vuan nga një sëmundje' që ne korçarët e quajmë: 'Vera, sa më e vjetër të jetë, aq më e mirë është'. Ky portier ka shumë vlera dhe është ndërtimi i modeleve që duam t'ia japim si shembull brezit të ri. Ja ku e kemi një model, që quhet Orges Shehi, dhe është vërtet nder që Skënderbeu e ka në skuadër një lojtar të tillë".
REKTORI- Momenti kulminant në sallë ka qenë ai i dhënies së titullit Orges Shehit dhe radha ka qenë e rektorit të universitetit, Prof.Dr. Ali Jashari. "Falënderoj, së pari, presidentin Takaj që ndodhet këtu dhe gjithë sportistët e Skënderbeut. Më lejoni që me vendim të senatit të shkollës t'i dorëzoj Orges Shehit titullin e nderit 'Doktor Honoris Causa' me motivacionin: 'Futbollist i madh i Skënderbeut dhe i mbarë futbollit shqiptar, që po nderon qytetin e Korçës dhe Shqipërinë në arenën ndërkombëtare. Ish-student dhe mik i universitetit 'Fan S. Noli' që me portretin e tij njerëzor dhe profesional është bërë shembull i gjallë për edukimin e brezave të rinj të sportit shqiptar'. Ky titull shoqërohet edhe me medaljen e artë", u shpreh rektori.
ORGES SHEHI- Pas këtij titulli, përpara gjithë të pranishmëve, Shehi u shpreh: "Është emocion vërtet shumë i madh. Kam fituar shumë tituj, kam fituar aq sa nuk e mendoja kurrë më parë dhe kam përjetuar emocione të jashtëzakonshme, ndërkohë kjo që po më nderoni sot mund t'ju them që është 'qershia mbi tortë'. I falënderoj të gjithë për këtë nder që më bëtë dhe trofeu është personal, por unë do ta ndaja me të gjithë. Kam më shumë se 7 vite në Korçë dhe ndihem mirë që po vazhdoj akoma të kontribuoj për këtë skuadër. Jam në një klub të madh dhe sot kam pak fjalë sepse më nderuat shumë. Ju falënderoj pa fund!".