Sherr i rrallë në Kamzë, grushte e shkelma dhe në fund... kafe
Rikthehet dhuna në futbollin e të rinjve. Degjeneron në sherr mes lojtarëve fundi i sfidës mes Shkëndijës dhe Besëlidhjes e vlefshme për kampionatin U-17 të Kategorisë së Parë. Takimi i luajtur në kompleksin e ekipeve kombëtare në Kamzë është fituar nga Besëlidhja 3-2. Qoshja e Tomi kanë shënuar për Shkëndijën, ndërsa Zeqja, Veseli e Frroku kanë realizuar për lezhjanët.
SHERRI
Me vërshëllimën e gjyqtarit Henri Bundo, që ka sinjalizuar fundin e takimit, ka nisur një sherr masiv ku janë përfshirë të gjithë lojtarët e të dyja skuadrave. Ka qenë një nxënës i shkollës së mjeshtërisë që është futur në fushë duke ofenduar trajnerin e Besëlidhjes, Atilio Lesi, duke u vërsulur drejt tij dhe kaq ka mjaftuar për t'u futur në sherr të gjithë lojtarët. Në këtë moment, trajneri i shkollës së mjeshtërisë shkon pranë nxënësit për ta tërhequr nga veprimi dhe kërkon ta largojë, por sherri tashmë ka nisur dhe lojtarët e të dyja skuadrave godasin me grushte e shkelma njëri-tjetrin, derisa kanë ndërhyrë forcat e sigurisë, duke bërë shpërndarjen e tyre. Më pas janë futur edhe civilë të tjerë, prindër e tifozë, dhe sherri ka zgjatur për pak çaste, derisa është qetësuar situata. Në fund, të dy trajnerët janë takuar me njëritjetrin duke kërkuar ndjesë për sa ndodhi para delegatit të ndeshjes dhe më pas kanë pirë nga një kafe së bashku. Po kështu është qetësuar situata edhe me lojtarët, duke u pajtuar dhe dhënë dorën njëritjetrit. Abdulla Dushku