S'ka autobus në “Wembley”, Klop premton spektakël kundër Spërsave
Gjermani: S’do përqendrohemi vetëm te Kejni
I vetmi autobus i parkuar do të jetë ai jashtë "Wembley"-t sot në kryendeshjen mes Totenhemit dhe Liverpulit. Barazimi i Spërsave në "Bernabeu" ishte një deklaratë edhe për Anglinë, për t'u treguar rivalëve forcën e vërtetë. Pasi larguan fantazmat e "Wembley"-t në Premier Ligë, ata rikthehen në "shtëpi" dhe mund të luajnë përsëri futbollin e tyre sulmues pa asnjë fobi. Ndërsa Liverpuli mendon se ka bërë kthesën pas paraqitjes europiane në Maribor (fituan 7-0 në Slloveni, suksesi më i thellë europian në transfertë).
Poçetino - "Për mua, Liverpuli është një prej skuadrave më të mira të Premier Ligës. Kanë lojtarë të pabesueshëm dhe një trajner të shkëlqyer. Do të jetë e vështirë të luajmë kundër tyre", tha trajneri i Totenhemit. "U kam thënë lojtarëve se duhet të jemi gati që të japim më të mirën dhe rivalizojmë për ta merituar fitoren. Por sigurisht që do të jetë një ndeshje shumë e fortë", vijoi argjentinasi. Klop - "Javën e shkuar arritëm t'i shmangnim topat që të shkonin te Lukaku dhe duhet të bëjmë të njëjtën gjë me Herri Kejnin, por nëse do të jemi shumë të përqendruar vetëm te një lojtar, atëherë Dele Ali do të jetë kudo apo Erikseni, i cili godet nga çdo cep apo jep asistet e tij vendimtare. Është një skuadër shumë e fortë Totenhemi, kështu që nuk duhet të përqendrohemi te një lojtar i vetëm", deklaroi tekniku i Liverpulit. Totenhemi nuk fiton në 9 ndeshjet e fundit kundër Liverpulit në kampionat (6 humbje dhe ka pësuar 22 gola). Por 3 nga 4 duelet e fundit kanë përfunduar në shenjën e barazimit, përfshirë dy përballjet e fundit në Londër.