UEFA dënon Skënderbeun, FSHF “këput” Flamurtarin

Banderola me “pulat që kakarisin”, vlonjatët humbin tifozët për 4 ndeshje. Pa shikues kundër korçarëve dhe Kukësit, klubi: Masakër!

Barazim me kosto, ai që Skënderbeu mori në "Elbasan Arena" në ndeshjen kundër Partizanit të Beogradit. Pavarësisht se organizimi ishte në mënyrë perfekte dhe u shmangën incidentet, ekipi korçar nuk i ka shpëtuar dënimit dhe gjobës nga UEFA. Një ndeshje pa tifozë dhe 60 mijë euro gjobë ishte vendimi që u mor nga Komisioni i Disiplinës në institucionin më të lartë të futbollit europian. UEFA evidentoi kore raciste në drejtim të kundërshtarit nga tifozëria shqiptare e pranishme në stadium dhe nuk ka toleruar në këtë aspekt, duke vendosur që ta dënojë Skënderbeun. Korçarët do të luajnë me dyer të mbyllura në sfidën ndaj Dinamos së Kievit, ndërkohë që duhet të derdhin në arkën e UEFA-s 60 mijë euro.

Njoftimi - "Klubi i Skënderbeut është njohur sot me vendimin e Komisionit të Disiplinës dhe Etikës pranë UEFA-s ndaj klubit bardhekuq për incidentet në ndeshjen kundër Partizanit të Beogradit. Skënderbeu është dënuar të zhvillojë ndeshjen e radhës brenda pa tifozë, si dhe me gjobë në masën 60.000 euro si pasojë e thirrjeve raciste ndaj kundërshtarit dhe ndezjes së lëndëve piroteknike. Sipas këtij vendimi, klubi i futbollit 'Skënderbeu' është i detyruar të luajë takimin e radhës në 'Elbasan Arena' ndaj Dinamos së Kievit me dyer të mbyllura. Sapo është njohur me dënimin disiplinor, klubi ka kërkuar nga komisioni vendimin e argumentuar", shkruhet në njoftimin e publikuar nga sajti zyrtar i klubit. Ndërkohë, "Panorama Sport" kontaktoi me presidentin Ardjan Takaj, i cili bëri me dije se klubi do ta apelojë vendimin e UEFA-s në ditët e ardhshme.