Katalonja shpall pavarësinë, “fshihet” Reali
Madrilenët anulojnë udhëtimin me autobusin e ekipit
Parlamenti katalanas dje aprovoi me votë të fshehtë ndarjen, e cila deklaron pavarësinë nga Spanja dhe kostituimin e Republikës katalane. Opozita e bashkuar nuk mori pjesë në votim dhe, siç nënvizoi kryetari i Parlamentit, Karme Forkadel, votuan pro 70 deputetë, kundër kishte 10 vota dhe dy abstenime. Kryeministri spanjoll Mariano Rajoi, menjëherë pas marrjes së lajmit, mblodhi pasditen e djeshme, në orën 19: 00, Këshillin e Ministrave, ku të gjithë vendosën të mos njohin këtë shpallje pavarësie të bërë nga krahina katalanase. Mbledhja e djeshme e qeverisë e kundërshtoi këtë fakt duke përdorur ligjin 155 të Kushtetutës, i cili i lejon Qeverisë së Spanjës që të marrë kontrollin direkt të një komuniteti autonom, nëse ajo refuzon që të respektojë ligjin dhe kushtetutën. FRIKËSOHET REALI Edhe pse kjo duket më shumë një çështje politike, fakt është që nga Pavarësia e Katalunjës preket direkt edhe arena sportive, duke nisur që nga kjo fundjavë, e cila pritet të jetë e tensionuar. Rivaliteti Madrid-Barcelonë është jo vetëm sportiv, por u shndërrua edhe në temë politike- sportive të hapur, duke parë që në ditën e referendumit të mbajtur në Katalunjë, Reali protestoi me flamurët spanjollë në "Santiago Bernabeu" dhe kjo irritoi jo pak kundërshtarët e tyre. Por e gjithë kjo "flakë" e ndezur së fundmi ka vënë në tension jo të vogël edhe klubin e Realit të Madridit, sidomos pas ngjarjes së djeshme. Skuadra e Zinedin Zidan do të luajë të dielën, në orën 16: 15 në Girona, skuadër e krahinës së Katalunjës dhe natyrisht që frika e ndonjë sulmi ndaj tyre është rritur
ndjeshëm. Prej dy ditësh, hoteli ku ata do të akomodohen është rrethuar, kontrolluar dhe është marrë në mbrojtje nga forca të shumta policore, disa prej të cilave të ardhura edhe nga Madridi madje. Për më shumë, të dielën, qyteti i Gironës do të jetë në shesh, pasi festojnë "Sant Narcis", prandaj kaosi mund të jetë edhe më i madh dhe siguria e Realit mund të jetë e cenuar. Edhe pse fillimisht dolën lajme se ndeshja mund të shtyhej, federata ka urdhëruar të luhet, por klubi kryeqytetas ka vendosur që të "maskohet" për të udhëtuar në Girona. Ata do të heqin dorë nga udhëtimi me autobusin e skuadrës dhe të gjithë lojtarët do të fshihen në makina normale, për të mbërritur në hotel, për të shmangur ndonjë pritë të mundshme. Me pak fjalë, transferta e Realit në Girona do të nisë me frikë.