Liga, zbardhen përplasjet e klubeve me Federatën
Nga sektori i arbitrimit, te komisionet juridike dhe organizimi i kampionatit, zbardhen mendimet ndryshe
Liga Profesioniste në futbollin shqiptar është ende një mision i pamundur, pavarësisht vullnetit të klubeve për të krijuar atë që thuajse çdo vend në Europë e ka prej vitesh. Pas nismës për të disatën herë të klubeve, FSHF mori përsipër që të mbështesë anëtarët e saj në krijimin e Ligës. Së fundmi, institucioni i futbollit ka bërë një draft- statut për Ligën, në mënyrë që t'ua thjeshtësojë klubeve për të hedhur më pas hapat e krijimit të saj. Ky draft, që e disponon edhe "Panorama Sport", është prej ditësh në duart e 10 klubeve të Kategorisë Superiore. Këto të fundit, për të pasur një ide më të qartë, pasi kanë shqyrtuar secila draftin, mësohet se kanë vendosur që me konsensus t'ua lënë në dorë juristëve që përfaqësojnë klube si Partizani dhe Skënderbeu. Për të parën herë në këto vitet e fundit, ku rivaliteti ka qenë i theksuar, të kuqtë dhe korçarë janë bërë bashkë, duke u ardhur në ndihmë edhe klubeve të tjera për të bërë një memorandum mbi draft-statutin e Ligës. Gazeta ka zbuluar ekskluzivisht këtë memorandum, që është miratuar nga anëtarët e klubeve dhe tashmë i është dorëzuar institucionit të futbollit shqiptar. Por, ajo që vërehet është se në shumë pika, klubet nuk janë dakord me draftin e paraqitur nga FSHF. Gjatë kësaj periudhe, klubet kanë studiuar statutin e Ligave të ndryshme në Europë, veçanërisht Serisë A dhe Ligës 1 franceze. Në këtë mënyrë, janë munduar të përshtatin propozimet e tyre.
JA PESË PIKAT KU KLUBET JANË KUNDËR
Gazeta publikon disa nga paqartësitë që kanë klubet në raport me FSHF-në. "Në analizën e Draft-Statutit të Ligës, propozuar nga Drejtoria Juridike e FSHF-së, kemi konstatuar problematika që lidhen me: Raportin e Ligës me FSHF; Të drejtat ekskluzive të Ligës; Organizimin e brendshëm; Anëtarësimin në Ligë të klubeve shqiptare dhe sektorin e Arbitrimit", citohej fillimisht në memorandumin që klubet i kanë dërguar FSHF- së. "Konstatohet se Liga nuk gëzon një autonomi organizative dhe funksion-
ale në realizimin e misionit të saj në raport me FSHF. Autonomia e kërkuar nga ana jonë nuk lidhet me mënyrën se si Liga do të disiplinojë aktivitetin e saj të përditshëm, por me mënyrën si ajo do të realizojë qëllimin e saj kryesor dhe më të rëndësishëm: organizimin e kampionatit. Forma e propozuar nga FSHF është e një marrëdhënie bashkëpunimi ndërmjet këtyre institucioneve, pa përcaktuar qartësisht kompetencat e secilës palë. Bashkëpunimi është një nocion i rëndësishëm, por mospërcaktimi i kompetencave respektive të palëve ( referuar Ligës dhe FSHF-së) bën që të mos jetë i realizueshëm, madje krijon marrëdhënie varësie qoftë hierarkike, qoftë bllokuese. Shembuj tipikë i mospasjes së një ndarje të mirëpërcaktuar të palëve janë:
a) Cili subjekt ka të drejtën
të miratojë strukturën e kampionatit?
b) Cili subjekt ka të drejtën të miratojë rregulloren e veprimtarisë së kampionatit?
c) Cili subjekt ka të drejtën e licencimit të klubeve pjesëmarrëse në kampionat?
d) Cili subjekt ka të drejtën të hedhë shortin e kampionatit e të përcaktojë kalendarin e tij?
e) Cili subjekt ka të drejtën të gjykojë shkeljet disiplinore të anëtarëve të saj ( klube, zyrtarë, lojtarë) të konsumuara gjatë zhvillimit të kampionatit?
f) Cili subjekt përfaqëson klubet në marrëdhëniet me të tretët?
g) Cili subjekt përfaqëson klubet në marrëdhënie me institucionet ndërkombëtare?;
Problematikat e lartpërmendura duhen të kenë një
parashikim të qartë statutor, në mënyrë që të evitohen konflikte në juridiksionin e palëve...", citohet ndër të tjera në memorandumin e klubeve.
PROPOZIMET
PËR KAMPIONATIN
"Sa i përket strukturës së kampionatit, ku përfshihen: numri i klubeve pjesëmarrëse, skema e kampionatit, metoda e përcaktimit të skuadrës fituese, numri i skuadrave që humbasin të drejtën e anëtarësimit si pasojë e rezultateve sportive (rënien nga Kategoria), metoda e përcaktimit të skuadrave pjesëmarrëse në kompeticionet europiane etj., të jetë e drejtë e Ligës dhe jo e FSHF- së. Ky propozim mbështetet mbi parimin se organizatori ( Liga) është subjekti që disiplinon veprimtarinë e aktivitetit (kampionatit) dhe do të ishte absurde çdo rrethanë tjetër. Rrjedhimisht, kjo autonomi do të shtrihet edhe në miratimin e rregullores së aktivitetit futbollistik dhe në të drejtën e shortit dhe të përcaktimit të kalendarit të kampionatit".
PROPOZIMET
PËR KOMISIONET
"Sa i përket gjykimit të shkeljeve disiplinore të konsumuara nga klubet pjesëmarrëse në aktivitetet e Ligës, jemi të mendimit që të ketë një reformë të thellë në sistemin e drejtësisë sportive në rang Lige dhe në rang federal. Kështu, propozohet:
a) Dhoma Kombëtare e Zgjidhjes së Konflikteve e Federatës Shqiptare të Futbollit të ridimensionohet në Gjykatë Arbitrazhi Federal e pavarur, e përbërë nga: Seksioni i Disiplinës dhe Seksioni i Statusit të Lojtarit.
b) Liga të ketë një Komision Disipline të sajën, e cila të gjykojë në lidhje me kundërvajtjet disiplinore të konsumuara nga klubet në aktivitetet e organizuara nga Liga.
c) Seksioni i Disiplinës i Gjykatës së Arbitrazhit Federal të shërbejë si shkallë ankimi/apeli për vendimet e marra nga Komisioni i Disiplinës së Ligës.
d) Liga të krijojë një Komision për Statusin e Lojtarit, kompetente për konfliktet ndërmjet klubeve, lojtarëve dhe trajnerëve.
e) Seksioni i Statusit të Lojtarit të Gjykatës së Arbitrazhit Federal të shërbejë si
shkallë ankimi/ apeli për vendimet e marra nga Komisioni për Statusin e Lojtarit të Ligës.
PROPOZIMI PËR SEKTORIN E GJYKIMIT
"Në Draft-Statutin e propozuar nga Drejtoria Juridike e FSHF-së konstatohet se nuk ka asnjë parashikim ligjor në raport me sektorin e arbitrimit. Arbitrimi dhe observimi i ndeshjeve është një element thelbësor për garantimin e cilësisë dhe nivelit të garës sportive dhe duhet t'i kushtohet një vëmendje e veçantë. Kështu, në kushtet e krijimit të një Lige profesioniste, është i nevojshëm reformimi i plotë i sektorit të arbitrimit në futbollin shqiptar, duke nxitur krijimin e një strukture të pavarur siç është Shoqata Shqiptare e Arbitrave të Futbollit. Kjo shoqatë, e cila duhet të kujdeset për përgatitjen cilësore të arbitrave shqiptare, rritjen e tyre në karrierë dhe monitorimin e performancës, duhet të jetë tërësisht e pavarur nga Liga dhe FSHF-ja. Sa u përket parashikimeve statutore të Ligës, është e nevojshme të sanksionohet marrëdhënia juridike e ardhshme e Ligës dhe Shoqatës Shqiptare të Arbitrave të Futbollit dhe mënyra e mbulimit të shpenzimeve për arbitrat e shortuar nga kjo shoqatë për ndeshjet e organizuara nga Liga.
- Shortimi i arbitrave. Duke qenë se Liga organizon kampionatin në nivelin më të lartë në shkallë vendi, Shoqata Shqiptare e Arbitrave të Futbollit duhet t'u japë prioritet garave të organizuara nga Liga, duke shortuar arbitrat me stemë FIFA ose arbitrat me vlerësimet periodike më të mira.
- Vlera e shpërblimeve për arbitrat. Tarifat e shërbimit të arbitrimit të jenë fikse dhe do të mbulohen nga Liga, për ndeshjet e organizuara nga ajo.
- Sistemi i vlerësimit dhe ndëshkimit të arbitrave. Palët duhet të jenë dakord se vlerësimi dhe renditja e arbitrave sipas performancës do të marrin në konsideratë edhe vlerësimet e bëra nga klubet.
Sektori i arbitrimit parashikohet të riformatohet brenda një periudhe 18- mujore, në pamundësi për të strukturuar këtë sektor për sezonin futbollistik 2018-2019. Deri në këtë moment, FSHF-ja të mbetet kompetente për organizimin e sektorit të arbitrimit".