Frika nga Flamurtari, Iuliano “shkund” ekipin
Trajneri kërkon ritëm, përqendrim dhe saktësi nga lojtarët
Ringjallja e Partizan it ka nisur prej tri javësh, por dueli i nesërm me Flamurtarin është prova e së vërtetës për të vërtetuar ndryshim real të "demave". Trajneri Iuliano gjithnjë ka shprehur besim tek ekipi që drejton dhe kjo bindje i është përforcuar më shumë së fundmi, pasi lojtarët kanë nisur që të përçojnë më shpejt idetë e tij. Ndeshja e kontrollit me Partizanin B, zhvilluar të enjten, ka dhënë të tjera sinjale pozitive, por stafi vijon të mbetet kërkues ndaj lojtarëve. Dje të kuqtë kanë kryer seancën e radhës në kuadër të përgatitjeve për Flamurtarin, ku gjithçka u karakterizua nga një atmosferë pozitive dhe optimizmi për të korrur suksesin e radhës. Megjithatë, drejtuesit janë me "këmbë në tokë", pasi e dinë forcën e kundërshtarit, aq më shumë të trajnerit Shpëtim Duro, një njohës i mirë i familjes "Partizani". Dashje pa dashje frika ekziston për shumë arsye. Kundërshtari kërkon vlerësim maksimal dhe ka një sulm më të frikshëm se "demat" për momentin. Arsyeja tjetër është që të ruhet ritmi, pasi humbja mund të kthejë hijet e javëve të para të kampionatit, si dhe duhet bërë e pamundura për të shtuar besimin te tifozët dhe drejtuesit e klubit. Për këto shkaqe, dje trajneri Iuliano ka qenë shumë kërkues ndaj lojtarëve në stërvitje, pasi zakonisht më shumë dëgjohen zërat e zëvendësve të tij gjatë përgatitjeve në terren. Dje Iuliano ka ndërhyrë
shpesh, duke kërkuar nga lojtarët që të jenë "të gjallë" në fushë dhe shpeshherë dëgjohej: "Zgjohuni, zgjohuni". Trajneri kërkon një Partizan ritmik ndaj Flamurtarit, përqendrim dhe saktësi në veprime. Kërkohet që lojtarët të jenë sa më shumë kombinues me njëri-tjetrin, me qarkullim të
shpejtë të topit dhe vertikalizime.
FORMACIONI - Për këtë takim, mungesa janë vetëm lojtarët e dëmtuar prej kohësh, si Çani, Fejzullahu dhe së fundmi Sukaj. Krasniqi rikthehet nga pezullimi dhe pritet që Jasir Asani të grumbullohet për herë të parë me
ekipin. Trajneri edhe gjatë ditës së djeshme i ka përzier si zakonisht kartat, duke e mbajtur enigmë formacionin për Flamurtarin. Gjithsesi, pak ndryshime priten nga ndeshja e fundit me Vllazninë, ndaj dilemat mund të jenë më shumë në rreshtimin e katërshes së mbrojtjes.