Laçi kthehet në shtëpi, sulmuesit japin garanci
Java e tetë e Kategorisë Superiore do të mbyllet me ndeshjen Laçi-Kamza, që do të luhet të hënën, në orën 14:00. Kurbinasit kthehen të luajnë në shtëpi pas një muaji, kjo për shkak të ndërhyrjeve që janë bërë në tapetin e fushës së stadiumit. Për herë të fundit në shtëpi Laçi ka luajtur më 30 shtator, ku ka mposhtur 2-0 Vllazninë. Ndërsa ndeshjen e javës së gjashtë, atë ndaj Flamurtarit, e planifikuar për t'u luajtur në stadiumin e Laçit, u zhvillua në Krujë dhe u mbyll në shifrat 1-1. Laçi i trajnerit Gentian Mezani mori një fitore bindëse në javën e fundit, ku fituan 3-0 në Lushnjë. Ndaj kurbinasit kërkojnë të vijojnë serinë e rezultateve pozitive edhe në sfidën e së hënës ndaj Kamzës. Bardhezinjtë shpresojnë që rikthimi pas një muaji të rezultojë fatsjellës, kjo edhe për faktin se skuadra gëzon një formë të mirë. Sulmi i skuadrës duket në formën më të mirë të mundshme, ku dyshja Rexhinaldo-Uzuni e treguan veten në transfertën e Lushnjës. Në tri javët e fundit, stafi teknik ka pasur edhe shërbimet e ishsulmuesit të Luftëtarit, Arturo Rexhinaldo, që ka shënuar tre gola në këto tri ndeshje. Sulmuesi nga Mozambiku e ka kaluar problemin që pati në fillim të sezonit, kështu që ndaj Kamzës pritet akoma më shumë nga afrikani. Trajneri Mezani nuk do të ketë në dispozicion edhe për këtë ndeshje mbrojtësin brazilian Ademir Souza, i cili vijon fazën e rikuperimit. Prej ditësh, grupit i është bashkuar mesfushori Kejvi Bardhi, i cili shikohet i gatshëm për stafin teknik për sfidën e së hënës ndaj Kamzës.