Dede: Tomori nuk u vodh, tani tregohen përralla
“Rregullorja ishte e qartë, një histori e mbyllur”
Nevil Dede është një prej protagonistëve të sezonit 19992000 ku në fund fitoi titullin me Tiranën. Në një rrëfim për gazetën, ish-mbrojtësi tregon se beratasve nuk u është vjedhur titulli, por në rregullore ka qenë e parashikuar që nëse ekipet e mbyllnin kampionatin me pikë të barabarta, do të luhej një finale. Dede shpjegon arsyet se pse Tomori e konsideroi vjedhje në atë kohë, ndërsa thotë se është absurde ideja e hedhur për t'i hequr titullin e atij viti Tiranës.
Keni qenë një prej protagonistëve të atij sezoni. Si ishte rregullorja dhe çfarë ndodhi?
Me sa mbaj mend, unë personalisht, por edhe të tjerët e dinim që do të luhej një ndeshje finale nëse dy ekipet e mbyllnin kampionatin me pikë të barabarta.
Pse Tomori e konsideroi vjedhje dhe sipas tyre u ndryshua rregullorja gjatë kampionatit duke u "shpikur" një finale?
Kur të vjen mundësia një herë për të dalë kampionë dhe nuk e arrin dot, të duket sikur të bëjnë padrejtësi. Kështu e gjykoj unë se ka ndodhur. Nuk dua të bëj polemika. Tomori erdhi me meritë deri në finale dhe e çoi ndeshjen deri te penalltitë, por në fund fitoi Tirana.
Çfarë kujtoni nga ajo ndeshje?
Kishte shumë tifozeri nga të dy ekipet. Ishte një atmosferë spektakolare. Tirana kaloi në avantazh dhe më pas Tomori barazoi në minutat e fundit. Mund ta fitonim ndeshjen brenda 90 minutave, por nuk ia arritëm.
Goli i Tomorit ishte autogol i yti apo e shënoi ndonjë lojtar beratas?
Nuk e mbaj mend mirë. Kemi kërcyer me kokë unë dhe lojtari i Tomorit, por nuk më kujtohet kontakti se kush e ka prekur topin. Mbaj mend që kam gjuajtur penalltinë e fundit.
Beratasit kanë kërkuar që t'i hiqet titulli Tiranës, ndërsa ish-sekretari i Përgjithshëm i FSHF-së në atë periudhë, Sulejman Starova, tha që të hapen arkivat nëse ka dyshime. Si e mendoni këtë çështje?
Më duket si diçka pa kuptim. Kanë kaluar shumë vite. Përderisa lojtarët e Tiranës kanë festuar, titulli është marrë, tifozët e Tomorit dhe lojtarët kanë qarë dhe çdo gjë është përjetuar aty për aty, më duket si pa vend që të kthehet mbrapa. Tani mbrapa mund të tregohen lloj-lloj historish. Unë mund të them atë që kemi përjetuar ne në atë kohë. Njerëzit e kanë jetuar dhe përjetuar atë moment. Tani mbrapa mund të tregojmë përralla, nuk ka shumë vlerë. Këto tani janë më shumë nostalgji.
I keni ndjekur këto ndeshje të këtij sezoni të Tiranës?
Jo shumë, por e di që nuk ka shumë rivalitet.
Po takimin e nesërm (sot) si e shihni?
Nuk e di çfarë skuadre ka ndërtuar Tomori, por nuk besoj se do t'i hapë shumë probleme Tiranës. Pres që të luhet një ndeshje normale futbolli. Edhe entuziazmi i tifozerive ka rënë pasi janë të dyja në Kategorinë e Parë.