VAR, kinezë dhe Bonuçi, ja si ndryshon klasikja
Pas shumë fitoresh me "katenaço", Juvja varet nga sulmi, ndërsa Milani kapet pas magjive të një spanjolli dhe milionave kineze. Nëse këtu shtojmë moviolën në fushë, krizën kuqezi dhe një arbitër që supersfidën e drejton për herë të parë, atëherë ndeshja e sotme mes dy gjigantëve të futbollit italian bëhet edhe më shumë pikante. "SUPERCLASSICO" - Masimiliano Alegri ka përvojën e mjaftueshme për të ditur se fitorja në "San Siro" arrihet vetëm duke paraqitur "Zonjën" më të bukur sezonale, ndaj edhe e mbajti tensionin e lartë pas ndeshjes ndaj Spalit. Diferenca mes Juves dhe Milanit një sezon më parë ishte e madhe, e megjithatë kuqezinjtë ngadhënjyen plot dy herë. Edhe në dy precedentët e tjerë që panë bardhezinjtë fitues, skuadra e Alegrit asnjëherë nuk e pati të lehtë. Një skuadër që shënon shumë, por edhe lejon diçka në mbrojtje, kundra një ekipi në kërkim të identitetit, ky është "Superclassico" aktual që ofron Seria A. VAR - Teknologjia nuk do të kishte përmbysur dot 2-1, me të cilin bardhezinjtë morën tri pikë falë Dibalës, pasi De Shiljo preku topin me dorë në minutën e 95- së, një sezon më parë. Me VAR-in, kuqezinjtë do të kishin një gol më tepër, kur nuk u pa një gol i Muntarit. Edhe në këtë sezon, të dy ekipet nuk janë fort të kënaqura nga puna e syrit teknologjik, ndaj rezultati do të ishte më i pranueshëm nëse vendoset në fushë dhe pa ndihma jashtë tapetit të blertë. BONUÇI - Mungesa e tij ka ulur ndjeshëm klikimet mbi këtë sfidë. Prej katër muajsh, kjo ndeshje ishte kthyer në betejën e mbrojtësit, që tashmë do ta shohë nga tribuna. I njëjti diskutim edhe për De Shiljon, i cili mungon për arsye dëmtimi. Leo mund të zbresë në fushë javës tjetër, ndërsa për Matian është ende kohë pritjeje, megjithëse do të grumbullohet nga Alegri për herë të parë pas dëmtimit në Barcelonë. JUVE E RE - Me siguri që Juventusi do të kishte ndonjë pikë më shumë nëse Dibala nuk do të gabonte ndaj dy portierëve shqiptarë. "Zonja" e këtij sezoni hutohet shumë, por dy vjet më parë, nisja ishte edhe më e dobët në nivel shifrash dhe paraqitjesh, e sidoqoftë pësonin më pak se tani. Duke parë që në sulm djemtë e Alegrit nuk falin, çelësi i suksesit për këtë vit duket se fshihet mes ekuilibrave të prapavijës. KINEZËT - Kjo do të jetë "Superclassico" italiane e parë pa Berluskonin. Vendin e "Kavalierit" e ka zënë një kinez, për të cilin informacionet janë të pakta. Merkato 250 milionëshe ishte një kartëvizitë e mirë për Serinë A, por ndoshta nuk mjafton. Alegri ka një superskuadër, ndërsa Montela ka vetëm një recetë për skuadrën ideale. Meqë jemi te recetat, Suso dhe Donaruma duhet të përgatisin ato të mrekullive nëse duan të nxjerrin përfundimisht Milanin nga bataku.