Valverde rigjen të kaluarën: S'ka "La Liga" pa Barcelonën
Ernesto Valverde do të rikthehet ditën e sotme në stadiumin që për disa vite ishte shtëpia e tij. Barcelona do të luajë sot në transfertë kundër Atletik Bilbaos, me trajnerin, i cili ka shmangur çdo emocion në lidhje me këtë rikthim, por në të njëjtën kohë nuk ka dashur të ndalet në çështjet politike të pavarësisë së vetëshpallur të Katalunjës. "Ka qenë një ditë impenjative për të gjithë ne te Barcelona, por nuk dua që të hyj në diskutimin e çështjeve politike. Një kampionat pa Barçën? Barcelona është ende pjesë e 'La Liga'-s dhe ne po flasim vetëm për një hipotezë. Personalisht nuk do ta imagjinoja kurrë një kampionat spanjoll pa Barcelonën dhe me kaq e mbyll diskutimin tim. Nuk e di se çfarë do të ndodhë në të ardhmen, dua të përqendrohem vetëm te fusha". Për sa i përket rikthimit të tij në Bilbao, Ernesto Valverde është i lumtur që do të takojë disa prej ish-lojtarëve, drejtuesve dhe miq të tij, por vetëm kaq, sepse në fushë do të kërkojë fitoren. "Ndeshja e nesërme (sot) do të jetë speciale për mua, pasi në Bilbao kam shumë kujtime të bukura. Por unë dua të fitoj aty, sepse tani mbroj ngjyrat e Barcelonës dhe emocione nuk do të kem. Ne kemi objektiva për të arritur dhe duam që të vazhdojmë udhëtimin tonë drejt titullit kampion". Iniesta dhe Maskerano - Në lidhje me formacionin që do të hedhë në fushë, Ernesto Valverde ka dy dyshime të forta. Mbrojtësi Havier Maskerano dhe mesfushori Andres Iniesta nuk janë stërvitur siç duhet me ekipin, si rrjedhojë e problemeve fizike dhe pritet ta nisin ndeshjen me Bilbaon nga pankina.