100 ndeshje me Napolin, tifozët: Hysaj, paguaj birrat!
54 000 të pranishëm në këmbë, ultrasit ngacmim shqiptarit
Në gusht të vitit 2014, një sh qiptar iu shtua listës së kuqezinjve në elitën e futbollit italian. Më 31 gusht, Elseid Hysaj nisi rrugëtimin e tij drejt suksesit në futbollin elitar përtej Adriatikut, duke shkelur për herë të parë në stadiumin "Dacia Arena" të Udines me fanellën e Empolit në Serinë A. Në 23 gusht të vitit pasardhës, Hysaj veshi për herë të parë fanellën e Napolit, por për fat të keq në një humbje ndaj Sasuolos. E nga ajo përballje, shqiptari ka arritur kuotën e 100 sfidave të zhvilluara me axurrët në të gjitha kompeticionet. Për këtë, dje i është bërë një ceremoni nderimi në shtëpi, në stadiumin "San Paolo".
JUBILEU
Nga Sasuolo te Sasuolo... Për mbrojtësin e Kombëtares, ka pasur një koincidencë interesante. Ndeshjen e tij të parë me napolitanët e ka bërë kundër Sasuolos, sfidë e fituar nga kjo e fundit, ndërkohë që ceremonia e 100 ndeshjeve me Napolin është bërë dje, në ndeshjen kundër kësaj skuadre. Në stadiumin "San Pao- lo", shqiptari është nderuar nga Napoli dhe të gjithë të pranishmit me një ceremoni. Para nisjes së takimit, Elseid Hysaj është përshëndetur nga klubi në nder të 100 ndeshjeve të Hysajt me këtë skuadër. Kapiteni Marek Hamshik i ka dhuruar mbrojtësit të Kombëtares një fanellë me numrin 100, si simbol të jubileut të arritur nga shqiptari. Nisur nga ndeshja e radhës që Napoli do të luajë në mesjavë kundër Mançester Sitit, trajneri Sarri e kishte pranuar prej disa ditësh që një nga futbollistët, të cilët do të pushonin në këtë ndeshje, do të ishte Hysaj dhe kështu ndodhi. Shqiptari u la pushim dje, në fitoren 3-1 të Napolit ndaj Sasuolos. Shqiptari e arriti këtë kuotë ndeshjesh para dy javësh, kundër Interit.
TIFOZËT
Mbrojtësi kuqezi është kthyer në një nga beniaminët e qytetit të Napolit dhe lidhja e tij me tifozët është e madhe. Prezenca e mbrojtësit kuqezi në formacion është tashmë e padiskutueshme dhe raporti miqësor i tij me ultrasit është vënë re edhe gjatë ceremonisë. Ndërkohë që kapiteni Hamshik i ka dhuruar fanellën me numrin 100, ultrsait e skuadrës kanë brohoritur në kor: "Hysaj, na paguaj birrat!". Një ngacmim miqësor kundrejt shqiptarit dhe tregues i miqësisë dhe raportit të mirë mes tij dhe ndjekësve të Napolit.