Doviciozo triumfon në Sepang, titulli vendoset në Valencia
Lagështira nuk ndikon, italiani në superformë
Andrea Doviciozo me Dukatin fitoi mëngjesin e sotëm garën e Çmimit të Madh të Malajzisë në MotoGP, garë e zhvilluar në pistën e Sepangut. Falë këtij suksesi dhe vendit të katërt të arritur nga kryesuesi i Botërorit, Mark Markuez (Honda), gjithçka për sa i përket titullit kampion mbetet ende e hapur. Kampioni i vitit 2017 do të përcaktohet pas dy javësh, në Valencia, në garën e fundit sezonale, me Markuez që ka 21 pikë avantazh karshi Doviciozo. Në podium u ngjitën sot bashkë me pilotin italian edhe Jorge Lorenco me motorin tjetër Dukati, si dhe francezi Johan Zarko me Yamaha. Piloti spanjoll i Hondës kishte sot një mundësi për t'u shpallur kampion në MotoGP, por fitorja e Andrea Doviciozos prishi planet e Mark Markuezit. Gjithsesi, spanjolli pranon se për të kjo garë nuk ka qenë aspak e lehtë.
GARA - Gara, ndryshe nga provat zyrtare 24 orë më parë, u zhvillua në një pistë të lagur, ndaj pilotët hasën mjaft vështirësi, sidomos ata të Yamahas, me Rosin e Vinales që asnjëherë nuk ishin në gjendje të duelonin për fitore. Ndryshe nga Dukati e Honda, që u përshtatën më mirë me këtë terren dhe dueluan mes tyre për titull gjatë gjithë kohës. Gara bëhet interesante që në start, me Markuez që niset mirë dhe fiton disa pozicione (e nisi i
shtati), duke nisur një duel të fortë me Doviciozo, të cilin e parakalon në kthesat e para. Në duel hyjnë edhe Lorenco e Pedroza, në një ditë të mirë dhe që ndikojnë mjaft në rezultatin përfundimtar.
RIVALITETI - Pas mesit të garës, vetëm 5 pilotë dyluftojnë
për fitore, teksa mes dy pilotëve të Dukatir dhe Hondës hyn edhe Zarko, që në fund do të renditet i treti. Doviciozo arrin të parakalojë Markuez, por mbetet pas shokut të tij të skuadrës Lorenco, që është i shpejtë dhe qëndron gjatë në krye.