Milani pa busull, sulmi 65 mln € dështim

Gjyqi ndaj Milanit ka nisur prej kohësh, por ndër akuzat e reja, rëndon ajo ndaj repartit ofensiv. Çdo skuadër në Serinë A që lufton për vendet e para ka në bomber që nga Ikardi e deri te Higuain, pa harruar Xhekon, Imobilen dhe Mertens. Ndër të tjera, Montelës tashmë i mungon edhe dikush që të shtyjë topin në rrjetë. Rastet e humbura dhe shterpësia e sulmuesit po shndërrohen në një problem tjetër të krizës kuqezi. Statistikat konfirmojnë lojën e djemve të Montelës si një ndër ekipet që godet më shumë drejt portës, por ato që shqetësojnë janë frytet e këtyre tentativave. BOMBER NË LETËR - Kaliniç i shumëkërkuar nga Montela mund të jetë funksional në lojën e "Djallit", po vështirë të arrijë nivelet e zotërinjve të sipërpërmendur. Andre Silva po përdoret kryesisht në Europë (jo se në Itali nuk ka luajtur), ndërsa Kutrone është tepër i ri për t'i ngarkuar përgjegjësinë e golit në radhët kuqezi. 65 nga 250 milionë euro të shpenzuara u investuan vetëm në sulm, ndërkohë që golat edhe kur vinë, mbajnë firma mesfushorësh ose të Susos. "Lojtarët 100 milionësh nuk vinë te Milani pasi pretendojnë të luajnë menjëherë në Ligën e Kampioneve". Deklarata e Montelës mund të jetë e drejtë, por me 200 milionë euro në dispozicion, ndoshta mund të bëhej diçka më shumë në aspektin e merkatos. Përgjegjësi këtu duhet ndarë me Fasonen dhe Mirabelin. LIDER - Nga Leonardo Bonuçi dhe Lukas Bilja, pritej regji në lojë dhe lidership. Dy nga blerjet më të përfolura mediatikisht të Milanit, janë shndërruar në një problem që ende nuk po gjen zgjidhje. Loja e tyre nuk po arrin të ngrihet në nivelet e përvojave në klubet e mëparshme, ndërsa në nivel karizme nuk kanë dhënë asnjë sinjal të potencialit të tyre. Nga dy lider dhe themele të revolucionit kinez, dyshja në fjalë është kthyer në një peshë për skuadrën brenda dhe jashtë fushe. Ndaj AEKut dhe Sasuolos në fundjavë do të kenë provimet e radhës me Milanin, që shpreson rikthimin e tyre në ndjekje të ëndrrës "Champions". LIMITE - Sado i aftë të jetë një mborjtës, ekuilibrat e një skuadre, më mirë se sulmuesit, nuk i sposton askush. Andre Silva ka talente, por nuk është akoma ai lojtari vendimtar që bën Ronaldon të mendojë se ka gjetur pasardhësin. Kaliniç nga ana tjetër e nisi mirë, por tashmë përpara portës po shfaq të gjitha limitet që e karakterizojnë, qofshin ato realizuese apo karakteriale. Me pak fjalë, Milani nuk ka një bomber dhe Kutrone është ende një diamant i pagdhendur. Duke mos prekur plagët e tjera, "Championsi" më shumë se sa një mision, mund të përbëjë një mirazh.