Moxhi “djeg” Çanin: Na duhet një sulmues tjetër

Rikonfirmohet Iuliano, por Partizani bën të njëjtin cikël çdo vit

Paraqitja e fundit me Fl amurtarin, ku Parti zani u mund 1-0 në shtëpi, ka rikthyer krizën te "demat". Të gjendur përpara kësaj situate alarmuese, dje, në ambientet e kompleksit stërvitor në Kamzë, për 90 minuta drejtuesit e kuq kanë analizuar situatën dhe kanë vënë pikat mbi "i". Pas përfundimit të seancës së djeshme stërvitore, Moxhi ka mbërritur në Kamzë nën shoqërinë e bashkëshortes së tij, Antonelo Preitit, Genc Tomorit dhe Edmond Haxhisë. Këtyre u janë bashkuar edhe stafi teknik dhe të gjithë së bashku kanë analizuar problematikën. Nuk janë marrë masa drastike, por është lënë të kuptohet se ato nuk do të mungojnë sa të vijë janari. Në prononcimin e dhënë pas mbledhjes, Moxhi analizoi humbjen e fundit dhe problemin e shikon në sulm, ku sipas tij po mbaron durimi për Edgar Çanin. Italiani nuk i ka kursyer pakënaqësitë ndaj sulmuesit, që u afrua me shumë bujë në verë. Çani praktikisht konsiderohet "i djegur" nga Moxhi, i cili pohoi se ekipi po shikon për një pykë, pasi mungesën e golit po e vuan shumë ekipi.

PRONONCIMI - "Sa i përket ndeshjes me Flamurtarin duhet të them që na mungon një sulmues. Dëmtimi i Çanit kushtëzon të gjithë skuadrën. Nëse e patë në ndeshjen e fundit, kjo dukej qartë. Unë mendoj se ky është një problem i rritjes së skuadrës, sepse nuk mendoj se ka dikush që mund të thotë, veçanërisht për pjesën e parë, se skuadra nuk bëri lojë të mirë. Fatkeqësisht ata bënë një gjuajtje dhe shënuan gol. Ndërsa ne, edhe pse në shtëpinë tonë, vuajtëm në rikuperimin e rezultatit. Duhet të them se kjo skuadër do të normalizohet në janar. Do të kërkojmë një pykë. Tani do të përpiqemi të grumbullojmë sa më shumë pikë të jetë e mundur për të shkuar në një zonë të volitshme për finalen e kampionatit. Nëse Çani nuk rikuperon, kjo do të bëhet një problem dhe problemin do të mundohemi ta zgjidhim në ndonjë mënyrë. Kjo është pika më kryesore. Ndaj Flamurtarit pësuam një gol dhe nuk mundem që të rikuperojmë, sepse mungon sulmuesi kryesor, finalizuesi, ai që përkthen në gol të gjithë lojën e skuadrës. A është Partizani për kampion? Nuk dua të flas për kampion ose jo kampion, e sigurt është që do ta çojmë në rrugën e duhur. Do të gjejmë edhe një sulmues. Do të gjejmë edhe një zgjidhje për situatën e Çanit, që nuk mund të shkojë më kështu. Unë kam respekt për atë si person dhe respekti ndaj tij do të mbetet, por nëse flasim profesionalisht, atëherë duhet bërë një diskutim tjetër dhe unë tani do të përpiqem të flas në një tjetër gjuhë", u shpreh Luçiano Moxhi për "Panorama Sport" pas analizës së djeshme që bënë drejtuesit e Partizanit.