Grushte dhe të kuq, Kamza bën ligjin në Laç
Sefgjini godet Raçiçin, gjyqtari nxjerr dy herë të kuqin
Një supergol në fund, zënkë mes lojtarëve, dy kartonë të kuq dhe mbi të gjitha futboll agresiv. Laçi-Kamza ka qenë një takim i gjithi për t'u parë, teksa në fund fitorja u ka buzëqeshur miqve, të cilët po konfirmohen tashmë si surpriza e bukur e këtij kampionati. Skuadra e Ramadan Ndreut ka parakaluar Partizanin në renditje, duke qenë pas tetë javësh forca e katërt e Superiores. Goli i Sebino Plakut i dha tri pikë të arta Kamzës në një transfertë shumë të vështirë, e për më tepër ndaj Laçit që po kalonte një moment të mirë. Me lojtarë që kanë eksperiencë në Superiore, por edhe kualitete si Fushtar në mbrojtje, Arrabal në mesfushë dhe Plaku e Raçiç në sulm, Kamza bëhet një kandidat tashmë për zonën europiane. Skuadra e Ndreut po ecën në rrugën e Luftëtarit të vjetshëm, por me ndryshimin që në përbërje ka emra, të cilët janë shpallur edhe kampionë në klube të tjera.
PJESA E PARË - Laçi vinte në këtë takim me dy mungesa të rëndësishme si Ademir Soza dhe Ansi Nika, të cilët kanë pasur probleme fizike dhe shëndetësore gjatë javës. Trajneri Gentian Mezani kishte improvizuar Arbër Shalën si mesfushor të majtë, ndërsa Uzuni ishte në krahun tjetër, duke mbështetur Rexhinaldon të vetëm në majën e sulmit. Nga ana tjetër, Kamzës i mungonte për shkak dëmtimi vetëm mbrojtësi Hektor Idrizaj. Në 25 minutat e para loja nuk ngjitet asnjëherë në nivelin mesatar. Skuadrat gabojnë shumë në mesfushë, ndërsa tentativat nga jashtë zone të Uzunit dhe Rexhinaldos janë shumë pak për të shkuar te goli. Në 15 minutat e fundit është Kamza që rrezikon më shumë, madje godet tranveresën me Plakun. Sulmuesi krijon dy raste të njëpasnjëshme, por është i pafat përballë Selmanit. Pjesa e parë mbyllet pa gola.
PJESA E DYTË - Mezani kupton se diçka nuk shkon në mesfushë, duke larguar Bardhin dhe aktivizuar Lushkjen. Është Uzuni që jep shkëndijën e parë me një goditje nga jashtë zone, por vetëm kaq. Kamza është më e qartë dhe arrin të dalë mirë në sulm, me Plakun, që sa herë është në kontakt me topin, krijon pështjellime në mbrojtjen vendëse. Gjithashtu prania e Raçiçit në majën e sulmit vendos shpesh në panik kurbinasit, që detyrohen të luajnë ashpër ndaj serbit. Loja ndryshon si me telekomandë, pas dy kartonëve të kuq të
menjëhershëm, fillimisht për Nezirin e Kamzës dhe Sefgjinin e Laçit. Kapiteni i Laçit goditi me grusht në stomak serbin Raçiç. Ndërkohë, Ndreu tregon se kërkon të fitojë ndeshjen, duke hedhur në fushë Imerin. Më pas aktivizon edhe Zefin e Mehmetin.
Kur mendohej se gjithçka do të mbyllej 0-0, një inkursion fantastik i Frashërit bën që Plaku të shënojë pas goditjes me kokë brenda zonës. Laçi shokohet nga ky gol dhe miqtë për pak e ndëshkojnë sërish me Imerin. Megjithatë, gjithçka përfundon 0-1.