Tifozët braktisin Laçin, Xhetani tërbohet me arbitrin
As 500 tifozë në stadium, drejtues që ankohen për arbitrimin dhe shfryjnë pas ndeshjes, lojtarë që provokojnë jo vetëm kundërshtarin, por edhe kryesorin, si dhe ofendime pa "doganë" nga tribuna e ashtuquajtur "VIP". Laçi-Kamza ishte ndeshja që mbylli javën e tetë të Kategorisë Superiore, por interesi për të ishte si i një miqësoreje vere. I çuditshëm është fakti që tifozët kurbinas nuk vijnë në stadium, edhe kur ekipi i tyre kalon një moment të mirë. As fitorja 0-3 në transfertën e Lushnjës nuk solli tifozë në stadium.
Raçiç - Sulmuesi serb i Kamzës po e kryen më së miri rolin e tij te skuadra e ngjitur këtë sezon në Superiore. Pasi ia doli të provokojë portierin Festim Miraka të Luftëtarit disa javë më parë në Gjirokastër, dje bëri të njëjtën gjë me Sefgjinin e Laçit. Edhe ky i fundit nuk i mbajti dot nervat, duke goditur Raçiçin dhe u ndëshkuar me të kuq. Mirëpo, sulmuesi nuk "provokoi" vetëm kundërshtarët. Ai u kap edhe me kryesorin Jorgji në fillim të lojës, por nuk u ndëshkua.
Xhetani - Fillimisht konteston Jorgjin për një vendim në minutën e 28të. Më pas futet në fushë, në pjesën e dytë, kur kryesori ndëshkoi me të kuq Sefgjinin. Bëhet fjalë për zv/trajnerin Saimir Xhetani, që dje ka qenë i papërmbajtshëm, ndërsa Jorgji e "kërcënoi" se do ta çonte në tribunë. Pas ndeshjes, mësohet se edhe drejtuesit më të lartë të Laçit kanë qenë të acaruar me arbitrin, duke e kontestuar atë në tunel. Ofendimet - Në Laç tashmë është bërë rrugë. Në minitribunën qendrore, ku krahas personaliteteve ulen edhe tifozë, ofendimet ndaj arbitrave apo lojtarëve janë të përhershme. Edhe ndaj Kamzës nuk munguan.