Bajern, Levandovski nuk ia del
Hejnkes: Ndaj Sëlltikut në sulm me Robenin ose Koman, e kemi fitoren në xhep
Në prag të sfidës së radhës në Cham pions League, asaj ndaj skuadrës së Sëlltikut, për skuadrën e kampionëve gjermanë do të mungojë edhe një prej lojtarëve kryesorë të saj, sulmuesi polak, Robert Levandovski, i cili mbeti i dëmtuar në ndeshjen ndaj Lajpcigut ditën e shtunë. Në këtë përballje, Levandovski pësoi një dëmtim në kofshën e këmbës, sipas të cilit nuk ka udhëtuar me skuadrën gjatë ditës së djeshme në Skoci. Gjatë një interviste, Levandovski ka folur edhe për shkaqet e këtij dëmtimi, të cilat kanë qenë aktivizimet e shpeshta dhe lodhja e madhe, duke qenë se ai është sulmuesi kryesor i kampionëve gjermanë. Gjatë kësaj deklarate, ai ka ndezur edhe alarmin për blerjen e sulmuesve si zëvendësues të tij, të cilit i është kundërpërgjigjur edhe shefi ekzekutiv i Bajernit, Karl-Hainz Rumenige, duke thënë se: "Nuk mendoj se një dëmtim i lehtë i Levandovskit duhet të na alarmojë. S'kemi nevojë për lojtarë të rinj, pasi kam besim të plotë te cilësitë e teknikut Hejnkes. Nëse do luanim ndaj Realit, Levandovski do të kish ardhur, por nuk duam të rrezikojmë në një ndeshje të tillë". Në prag të sfidës ka folur edhe trajneri i Bajernit, Jup Hejnkes i cili ka marrë pjesë në konferencën për shtyp në Skoci.
HEJNKES- Sa i përket një rotacioni të mundshëm në
sfidën ndaj Sëlltikut, tekniku bavarez ka thënë se: "Kemi pasur një seancë të qetë stërvitore gjatë ditëve të fundit dhe mendoj se duhet të vendos në prag të ndeshjes lidhur me formacionin dhe lojtarët që do të luajnë që prej startit. Më duhet edhe pak kohë për të biseduar
me ta dhe për të marrë një vendim konkret".
MBI LEVANDOVSKIN"Pa dyshim që dëmtimi i Robert Levandovskit ka ardhur si një rrufe në qiell të hapur për ne. Megjithatë është një dëmtim me të cilin nuk dua të rrezikoj, pasi mund të ndodhë që ai të dëmtojë muskulin dhe të mbetet jashtë për javë të tëra. Nga ana tjetër edhe Tomas Myler ka mbetur i dëmtuar, çka na krijon më tepër problem. Megjithatë, mendoj se do të gjej një zgjidhje mjaft të mirë. Mund të luajmë me formacionin 4-4-2 me Roben dhe Koman në sulm ose t'i vendosim ata në krahë dhe të aktivizojmë në sulm një prej mesfushorëve qëndrorë. Çdo gjë është e mundur".
Mbi Sëlltikun- "Sëlltiku është një skuadër me një tifozëri të veçantë e spektakolare, ndaj mendoj se ata do të luajnë shumë herë më mirë se në Mynih për këtë fakt. Skocezët luajnë një futboll tepër të bukur dhe jam i bindur se rivalët tanë do të japin të njëjtën gjë në sfidën e sotme. Megjithatë skuadra jonë është mjaft e përgatitur dhe është mësuar me kundërshtarë të tillë dhe mendoj se do të shënojmë sërish një triumf të pastër ndaj tyre".