Traumë pas humbjes, Sinella: Ishte aksident
Trajneri: I ndodh çdo ekipi, më mirë tani në fillim
Tronditja nga humbja me Egnatian në ka mpin verdhezi duket se është lënë pas. Ekipi ka nisur që të hënën përgatitjet për transfertën në Shkodër ndaj Vllaznisë B. Kavajasit pësuan një prej humbjeve më të thella në fushën e tyre, duke pësuar pesë gola nga Egnatia. Megjithatë, trajneri Bledar Sinella po mendon që të mos e dramatizojë situatën. Sipas tij, çdo skuadër e ka një ditë të keqe ku mund të pësojë disfata të tilla.
TRAJNERI - Trajneri Bledar Sinella e shpreh këtë duke e quajtur thjesht një aksident që i ndodh çdo klubi dhe se Besa morri mësimin më të hidhur se çfarë mund të të ndodhë kur e mendon ndeshjen e fituar para kohe. "Çdo ekipi i ka ndodhur të ketë një ditë të keqe. Nuk jemi ne të parët që e pësojmë. Ishte një ndeshje ku i sajuam vetë golat dhe pasi bëmë analizën tashmë nuk duam më t'i kthehemi asaj humbjeje. Më mirë që na ndodhi tani në fillim që të nxjerrim mësimet tona e të vëmë pikat mbi "i". Fati ynë qëndron në faktin se, pavarësisht humbjes, jemi përsëri me diferencë të vogël me kreun. E kam thënë vazhdimisht se objektivi ynë momental mbetet mbetja në 5-shen e parë pas dy fazave të para. Kampionati sapo ka nisur dhe ka mjaft ndeshje përpara. Ne duhet të jemi me këmbë në tokë, pasi çdo ndeshje kërkon angazhim maksimal, sakrificë, vëmendje dhe seriozitet. Mësimi që morëm nga Egnatia besoj e dëshmon më së miri këtë", shprehet fillimisht Sinella në prononcimin e tij. Kujtojmë se trajneri ishte i dënuar dhe nuk e drejtoi ekipin në atë sfidë. Tashmë verdhezinjtë kanë përpara transfertën në Shkodër ndaj Vllaznisë B. "E thashë edhe më lart se janë luajtur vetëm 5 javë, thënë ndryshe ka mjaft ndeshje përpara. Ne po përgatitemi seriozisht për transfertën në Shkodër ndaj Vllaznisë B. Humbja me Egnatian vërtetoi më së miri se nuk ka kundërshtarë të fortë apo të dobët. Të gjithë rivalët qoftë edhe vendi i fundit nëse ti nuk jep atë që kërkohet, shndërrohet në ekip të vështirë. Prandaj e ritheksoj se duhet të qëndrojmë me këmbë të tokë duke i parë ndeshjet me radhë", përfundon prononcimin e tij për gazetën trajneri Bledar Sinella.