Një faraon i bën magji Çelsit, Roma merr kreun
Italianëve u mjafton fitorja ndaj Karabakut për t'u kualifikuar
Tre gola të tjerë, por këtë herë vlejnë më shumë. El Sharaui konfirmon momentin e tij magjik dhe me një dopietë (goli i parë pas vetëm 44 sekondash dhe hyri në histori si më i shpejti i Romës në Champions), shtroi rrugën e një fitoreje madhështore të Romës ndaj Çelsit, e cila i afron italianët me 1/8-at e Champions-it. Fitore e merituar e skuadrës së Di Françeskos, që në pjesën e dytë e hipotekoi fitoren edhe me një silurë të Perotit. Ky i fundit shpërdori edhe një rast që do ta bënte humbjen e kampionëve të Anglisë katastrofike. Roma ngjitet në krye të Grupit C dhe tani i mjafton një sukses ndaj Karabakut të Agollit në javën e fundit për të prerë biletën në fazën e 1/8-ave (në mes ka edhe duelin direkt me Atletikon).
KRONIKA - Ndeshja rinis atje ku ishte lënë në "Stamford Bridge", me 100 km/ h. 24 sekonda dhe Bakajoko ushqen Pedron, i cili nuk godet siç duhet përballë Alisonit. Pastaj topi shkon në krahun tjetër, Kolarov gjen |hekon, i cili me një spond zbulon El Sharauin që afrohet në sprint dhe goditja fluturimthi me të jashtmen sjell një gol spektakolar. Pastaj Hazard nis aksionet e tij personale. Belgu provon 4 herë në harkun e 20 minutave, por nuk arrin të barazojë. Çelsi avancon dhe Roma mbyllet pas për të goditur me kundërsulm. Në 20' provon Hazard, por Alison pret. 4
minuta më vonë është sërish Çelsi: dhe përsëri me belgun që driblon Florencin, por gjen përsëri Alison. Pak sekonda më vonë, Kolarov gabon rivënien, por Morata nuk arrin të përfitojë. Pas zemërimit të Çelsit, Roma i afrohet golit në 35', pas një gafe të Luizit, por El Sharaui nuk e finalizon siç duhet kundërsulmin e vendësve. Festa vetëm sa shtyhet, sepse në minutën e 36-të Naingolan nis një top në zonën kundërshtare,
Rydiger heziton për ta larguar dhe pas tij shfaqet El Sharaui, i cili është gati për të mposhtur për herë të dytë Kurtuanë. Çelsi provon të rrisë ritmin edhe në pjesën e dytë, por është |heko ai që i shkon më pranë golit me një të majtë të fortë. Konte nxjerr Kejhill për Uillianin, Azpilikueta spostohet në qendër dhe Pedros duhet të përshkojë gjithë korsinë e majtë. S'kalon asnjë minutë dhe Morata i afrohet golit. Lëvizja e Kontes rezulton
një vetëvrasje taktike, sepse i hap rrugën Kolarovit dhe Perotit që duhet t'i mbajë Pedro. Dhe nuk është rastësi që edhe goli i tretë vjen nga anët e spanjollit: bën gjithçka Peroti pas një topi të rikuperuar nga Kolarov dhe argjentinasi shkarkon të djathtën nga më shumë se 20 metra. 5 minuta më vonë ka edhe rastin e golit të katërt, por godet jashtë. Roma shpërdoron edhe dy herë të tjera "pokerin". Ishte mbrëmja e tyre...