"Kemi nevojë të na trembin, që të japim më të mirën"
Masimiliano Alegri edhe një herë tjetër la fushën e lojës shumë i nervozuar. Pas vërshëllimës së trefishtë, trajneri i Juventusit shfrynte me veten dhe nuk donte të takonte as kolegun e tij rival, Zhorzh Zhezus, por iu drejtua menjëherë dhomave të zhveshjes. Livornezi 50- vjeçar do të kishte dashur që ta kishte mbyllur që mbrëmë çështjen e kualifikimit, por në fund edhe ai duhet të kënaqet me barazimin. "Jam paksa nervoz, sepse më vjen keq për mënyrën sesi e interpretuam ndeshjen. Mund ta kishim mbyllur çështjen e kualifikimit dhe dështuam një objektiv tonin. Tani do na duhet të shpenzojmë të tjera energji të mëdha në Ligën e Kampioneve, për të marrë atë që e kemi detyrim. Ndaj Barcelonës dhe Olimpiakosit në Athinë na presin dy ndeshje të vështira, por kurrsesi nuk dua të shoh me një paraqitje si ajo e jona në pjesën e parë. Në të dytën u shprehëm më mirë dhe nuk më mbetet gjë tjetër veçse të pranoj barazimin dhe golin e Higuainit. Pas fitores me Milanin mendoja se ishim zgjuar nga gjumi, por edhe njëherë tjetër u gabova. Me sa duket, kemi nevojë që kundërshtarët të na trembin seriozisht, në mënyrë që ne të reagojmë dhe kështu nuk më pëlqen. Më tremb kalendari i Serisë A? Po, sigurisht, sepse na presin muaj të ngjeshur me ndeshje. Nëse mundnim Sportingun, do ta shihnim drejt Serisë A më të relaksuar, por nuk ia dolëm. Tani të përqendrohemi te Benevento, një skuadër që, edhe pse ka humbur 11 ndeshje kampionat, sërish do të ketë respektin tonë maksimal", tha pas ndeshjes Alegri.