Katër dëmtimet që “gjymtuan” Kukësin
Hallaçi dhe Musolli gati për në Vlorë, dy nuk ia dalin
Kukësi do të jetë të dielën në Vlorë, ku synimi i vetëm për verilindorët është trepikëshi, pavarësisht se një gjë e tillë nuk do të jetë e lehtë duke parë se Flamurtari është dy pikë larg verilindorëve. Por, nga mënyra se si janë zhvilluar ngjarjet në kampin kuksian, vetëm fitorja largon presionin dhe hendekun mes presidentit Gjici dhe stafit teknik. Fakti që Skënderbeu është pesë pikë më shumë sesa Kukësi në renditje, shqetëson pa masë kreun e klubit. Gara për titull pritet të jetë shumë e fortë, por vetëm nëse Kukësi ecën me të njëjtin "marsh" si Skënderbeu, pasi në të kundërt shumë shpejt komprometohet objektivi "titull" për kampionët në fuqi këtë vit. Për ndeshjen e radhës ndaj vlonjatëve, për trajnerin Milinkoviç pritet të rikthehet nga minuta e parë kapiteni Hallaçi dhe mesfushori Musolli.
DËMTIMET - Dëmtimet janë kthyer në makth te Kukësi, pasi lojtarët liderë të saj si Shameti, Zeqiri, Hallaci, Musolli kanë pasur probleme dhe kanë qëndruar për një kohë të
gjatë jashtë fushave. Mbrojtësi gjirokastrit ra "viktimë" e tapetit të stadiumit "Zeqir Ymeri" në Kukës, ku në takimin ndaj Laçit i luajtur me datë 24 shtator, gjatë një dyluftimi ka shembur thembrën. Nga dhimbjet, Shameti kërkoi zëvendësim. Dëmtimi në
pamje të parë u konsiderua jo serioz, por nga ekzaminimet e mëvonshme ai rezultoi i rëndë, aq sa me urdhër të mjekëve shqiptarë dhe atyre grek të PAS Janinës, por dhe për shkak të dhimbjeve, futbollisti me mjaft eksperiencë nuk mundej të kryente ushtrime
me topin për me tepër se tri javë. Aktualisht Shameti u është kthyer fushave duke kryer stërvitje dhe nga provat e bëra, pritet që në takimin ndaj Kamzës në mesin e muajit të jetë 100 për qind i gatshëm. Ndaj Flamurtarit prezenca e tij është e dyshimtë,
pasi nëse aktivizohet rrezikon dëmtim edhe më të rëndë.
ZEQIRI - Mesfushori vlonjat Hair Zeqiri është një prej mesfushorëve të klubit verilindor, që kur ishte në momentin më të mirë të tij, u dëmtua. 29-vjeçari luajti në sfidën Kukësi- Skënderbeu, me datë 2 tetor për pak minuta, e pas përfundimit të këtij takimi vlonjati rezultoi se kishte pësuar një tërheqje muskulore, dëmtim i cili e mban që nga ajo ditë e deri në takimin ndaj Flamurtarit jashtë fushave. Zeqiri ka luajtur vetëm 185 minuta. Ai pritet të rikthehet në ndeshjen e radhës.
HALLAÇI - Kapiteni u dëmtua në sfidën në transfertë që Kukësi fitoi bindshëm në Gjirokastër me rezultatin 0-3. Hallaçi gjithashtu u zëvendësua në pushim të ndeshjes dhe nga ekzaminimet e bëra, mbrojtësi i djathtë rezultoi se kishte pësuar tërheqje të një grade të lehtë. Pritet që mungesa e tij të zgjasë deri në sfidën ndaj Kamzës, në të cilën ai mendohet të jetë 100 për qind i gatshëm.
Musolli - Mungesë e vyer për formacionin kuksian ka qenë dhe Besar Musolli, i cili që mbas grumbullimit me Kombëtaren e Kosovës, më datë 10 tetor, ka ardhur me probleme shëndetësore dhe që prej asaj date ka munguar plot 3 javë. Musolli ka pasur probleme shëndetësore dhe është rikthyer vetëm në takimin ndaj Vllaznisë dhe ka luajtur për disa minuta.