“Mega Liga”, ja projekti që pritet të startojë në 2019

Në Rumani e bëjnë të sigurt, 200 mln euro të ardhura për skuadrat nga Europa Juglindore

Sporti dhe konkretisht futbolli duket se po shërbejnë për të zhdukur një herë e përgjithmonë kufijtë gjeografik edhe në vendet e Europës Juglindore, që ende nuk janë bërë pjesë e Europës së Bashkuar në aspektin politik. Së fundmi, është hedhur ideja e "Mega Ligës". Një projekt i iniciuar në Rumani, që bën fjalë për pjesëmarrjen e disa skuadrave të përzgjedhura nga vende të ndryshme në Europën Juglindore, pa cenuar kampionatet respektive dhe që do të ketë të ardhura të konsiderueshme.

"Mega Liga"

Projekti përfshin vendet si: Rumania, Greqia, Izraeli, Serbia, Bullgaria, Kroacia, Bosnja dhe Hercegovina, Sllovenia, Qipro, Maqedonia, Azerbajxhani, Shqipëria, Gjeorgjia, Armenia, Moldavia, Kosova dhe Mali i Zi. Në total, organizatorët kanë përllogaritur që të kenë 42 skuadra pjesëmarrëse, të cilat do të ndahen në dy kategori. 20 në të parën dhe 22 në të dytën. Projekti

Në mediat rumune, është njëri prej ideatorëve që e ka saktësuar edhe shifrën e madhe të të ardhurave që pritet të ketë një projekt i tillë. "Presim që të ketë të paktën 200 milionë euro të ardhura nga të drejtat televizive për këtë kompeticion. Urojmë dhe shpresojmë që të gjejmë gjuhën e përbashkët me federatat dhe skuadrat respektive, në mënyrë që kjo nismë të mos cenojë as kampionatet vendëse", ka deklaruar Rumen Vatkov, për "Ziare. com". Ish- drejtori i marketingut në klubin e CSKA Sofjes është një prej ideatorëve që ka përpiluar edhe formulën financiare për funksionimin e kësaj lige. Në bazë të idesë fillestare, organizatorët presin që të përzgjedhin të paktën nga një ambasador në secilin prej këtyre vendeve, i cili do të jetë një njeri me influencë në botën sportive.