Nga Dinamo në Itali, Qato në rrugën e suksesit
Historia e mesfushorit 19-vjeçar shqiptar që po shkëlqen në vendin fqinj
Nga Dinamo tek Avelino dhe tani te Vastoxhirardi në Serinë D. Klinti Qato, mesfushori shqiptar që ka qenë pjesë e bluve në Shqipëri, tashmë po shijon suksesin në Itali. 19-vjeçari sakrifikoi për një vit duke bërë vetëm stërvitje me skuadrën e Avelinos, por tani po tregon aftësitë e tij me ekipin e Vastoxhirardit ku po shkëlqen me golat dhe asistet. HISTORIA
Dy vite më parë, Qato vendosi të linte Shqipërinë dhe u transferua në Itali. Fillimisht, u bë pjesë e skuadrës së Avelinos ku
qëndroi aty për një vit. Por, për shkak se klubi nuk arriti që të bënte dokumentacionin e plotë, mesfushori për një vit bëri vetëm stërvitje dhe u aktivizua në ndeshjet miqësore. Në janar të këtij viti, lojtari transferohet te Vastoxhirardi në Serinë D në Itali. Paraqitje
shumë të mira dhe gola njëkohësisht. Lojtari e fitoi shumë shpejt vendin e tij në formacion, në një kohë që presidenti po bindej nga java në javë se Qato ishte një zgjedhje e duhur.
FORMA E MIRË
Qato e ka nisur në mënyrën më të mirë këtë sezon. Në tri ndeshjet e para, ai ka shënuar dy gola dhe ka dhënë dy asiste në fitoren e fundit 5-0. Aktualisht, Vastoxhirardi renditen në vendin e dytë, ndërsa Qato është një prej titullarëve të padiskutueshëm të skuadrës. Mediat italiane flasin për një futbollist të talentuar dhe me të ardhme. Portali "Molisenetwork. net" i ka kushtuar një shkrim mesfushorit të avancuar. "Jam shumë i lumtur që gjendem në këtë realitet. Është një ambient shumë i mirë ku të gjithë kërkojnë të japin maksimumin për skuadrën. Ekipi do të bëjë gjithçka për t'u ngjitur më lart. Nuk ndihemi aspak inferiorë ndaj askujt. Ky është një kampionat i komplikuar që është i hapur deri në javën e fundit. Kemi në përbërje futbollistë cilësorë me eksperiencë në kategori më të larta dhe, në këtë mënyrë, do të kërkojmë të fitojmë në çdo sfidë", shprehet lojtari në prononcimin e tij për portalin italian. "Shpresoj që në të ardhmen të luaj si profesionist në kategori më të larta. Këtu në Molise ndihem shumë mirë dhe është një ambient perfekt, si në aspektin njerëzor, edhe atë futbollistik. Shpresoj që sezonin e ardhshëm të luaj në një kategori më lart, ndoshta edhe me Vastoxhirardin", deklaronte Klinti Qato në prononcimin e tij për portalin italian. Besar Bozgo