Hamilton sulmon: Fetel avantazhohet nga gjyqtarët

Kampioni i botës nuk e përtypi përfitimin në SHBA

Mes Luis Hamiltonit dhe Sebastian Fetelit tashmë është një luftë e hapur. Edhe pse piloti i Mercedesit u shpall kampion bote në Meksikë, viti i britanikut ka qenë plot mllef, sepse sipas tij, kundërshtari i Ferrarit u ndihmua edhe nga gjyqtarët e pistës, sidomos në Ostin, në Çmimin e madh të Shteteve të Bashkuara të Amerikës. Këtë ai nuk ngurroi që ta bëjë hapur gjatë një bashkëbisedimi, ndërsa garonte, me Çarli Uajting, shefin e inxhinierëve. Ndoshta, për të mund të kishte ardhur edhe një ndëshkim, duke qenë se tashmë bisedat mes pilotëve dhe bokseve janë të hapura dhe lehtësisht të transkriptueshme edhe për teleshikuesit, por Hamilton as që ka dashur t'ia dijë për këtë. Media spanjolle ka zbardhur bisedën në lidhje me parakalimin e bërë nga Fetel ndaj tij, me gjermanin që doli jashtë kordonëve të pistës, duke pasur një avantazh të vogël. Pikërisht në lidhje me këtë episod në Ostin, piloti kërkoi shpjegime: "Pse Fetel nuk u ndëshkua, por isha unë i vetmi. Ky është një avantazhim i hapur nga ana e gjyqtarëve. Të gjithë e panë hapur se çfarë ndodhi", shfrynte Hamilton. Ndërkohë, Uajting ia ka shpjeguar arsyen: "Pati një avantazh të vogël në atë kthesë, por nuk është se të fitoi ndonjë hapësirë të madhe në kohë, sepse distanca është po e njëjta. Vërtet u hap pak më shumë në kthesë, por nuk përfitoi asgjë. Gjithçka është brenda normave, garo i qetë", përgjigjej kryeinxhinieri. Dhe,

fatmirësisht, në fund gjithçka shkoi mirë për Hamiltonin, pasi ai parakalim nuk ndikoi në suksesin e tij në Ostin, ashtu sikurse as aksidenti mes tij, Fetelit dhe Vershtapenit në Meksikë, ku Hamiltonit i mjaftoi edhe vendi i nëntë për t'u shpallur kampion bote.