Ahmedi luan vetëm 9 minuta, Liverpuli tre gola Mariborit
Liverpuli zhbllokohet vetëm në pjesën e dytë ndaj Mariborit të Ahmedit (luan vetëm 9 minuta). Ndeshja zhbllokohet nga Salah në minutën e 49-të. Në minutën e 53-të, Milneri gabon përballë Handanoviçit nga pika e bardhë, por mbyllin gjithçka Xhan dhe Starrixh në fund. Liverpuli blindon vendin e parë në Grupin E (8 pikë) dhe ndiqet nga Sevija, e cila fitoi 2-1 ndaj Spartakut të Moskës.
GRUPI F - Shahtjori mposht 3-1 Fejnordin. Në Kharkivë ka emocione që nga minuta e parë deri tek e fundit. Holandezët kalojnë të parët në avantazh me Joergensen (12'), i cili harrohet
në zonë. Por barazimi vjen vetëm disa minuta më pas, me Ferreirën që dërgon topin në rrjetë pas një pritjeje të Xhons. Portieri australian ndëshkohet edhe nga e majta e Marlos në 17' dhe shkohet në pushim me rezultatin 2-1. Është sërish Marlos në pjesën e dytë që mbyll
llogaritë me golin e tretë. Ukrainasit janë pranë kualifikimit, por mungon një pikë që duhet t'ia marrin Napolit ose Sitit në ndeshjet e mbetura.
GRUPI G - Mes Beshiktashit dhe Monakos nuk ka fitues dhe mbyllet gjithçka në barazim 1-1. Por humbja e Lajpcigut me Porton bën që çështja e kualifikimit të shtyhet për turqit në këtë grup. Ai që hesht përkohësisht tifozët turq është Markos Lopez, portugezi shtatshkurtër që debutonte për Sitin e Mançinit 4 vite më parë. Por, në fillim të pjesë së dytë, barazon Tosun me penallti. Në Portugali përmbysen hierarkitë e grupit, të paktën për vendin e dytë. Goli i Maksi Pereiras në shtesë jo vetëm blindon suksesin e "dragonjve", por u jep atyre avantazhin ndaj gjermanëve, në rast se mbërrihet me pikë të barabarta. Një tjetër Pereira, Danilo, kishte shënuar golin e 2-1 pas atyre të Herrerës dhe Vernerit.