Dibalën s'e mbajnë më nervat, i shfryn te... palestrinat
Trajneri Alegri e konfirmon: S'i del asgjë që do!
As nata e Hallouinit nuk ia "trembi" mallkimin "Champions" Paulo Dibalës. Argjentinasi nuk arriti që të zhbllokohet as kundër Sportingut të Lisbonës, duke ruajtur kuotën zero gola dhe ky fakt duket se po e nervozon shumë numrin 10 të Juventusit. Për të erdhi edhe zëvendësimi i radhës, sepse trajneri Masimiliano Alegri e kupton që sulmuesi po tenton çdo gjë për të kaluar këtë mungesë goli, por nga ky fakt, në disa raste, mund të rrezikohej edhe skuadra. Prandaj edhe udhëtimi drejt pankinës ishte diçka që gjithashtu nuk i pëlqeu, si në rastin edhe të sfidës kundër Milanit. Nëse në "San Siro" e pranoi thirrjen në pankinë duke mërmëritur me kokën poshtë, diçka që nënvizonte qartë se nuk e pranonte këtë zëvendësim, të martën në mbrëmje, në Portugali, nuk shprehu asgjë me zë, por me t'u afruar pranë pankinës hoqi palestrinat (mbrojtëset e kockës së fyellit) dhe i lëshoi ato me forcë drejt saj, duke konfirmuar momentin e tij kaotik, i cili po i peshon shumë. Në ditët e kaluara u nënvizua fakti se Dibala nuk po vuan vetëm nga mungesa e golit, por edhe nga disa çështje jashtë fushe, të cilat po e turbullojnë. E para është ndarja nga e fejuara e tij historike Antonela Kavalieri, por në të njëjtën kohë edhe nga një denoncim i ish- sponsorit të tij, "Puma", pas një prishje kontrate jo konsensuale, me një vlerë disa miliona eurosh, që
mund të peshojë në xhepat e futbollistit. Në përfundim të sfidës me Sportingun, i pari që ka shkuar ta thërrasë në apel Dibalën ishte portieri Xhixhi Bufon, i cili e ka parë gjestin nga porta, me sa duket dhe ka kërkuar të qetësojë Paulon, i cili pas disa fjalëve e ka mirëkuptuar
kapitenin e tij, duke e përqafuar. Por në fund, edhe trajneri Alegri ka pranuar momentin jo pozitiv: "E kuptoj Dibalën sepse asgjë që kërkon të bëj në fushë nuk po i del. Por ai duhet thjesht të qëndrojë i qetë dhe ky moment do të kalojë. Unë dhe e gjithë skuadra jemi më te".