Supersfida në Vlorë, vendos faktori... “B”

Bushiç i hap sfidë Bakajt në garën për “Këpucën e Artë”

Flamurtari- Kukësi është një duel që do të përcaktojë shumë për fatet e sezonit të të dyja skuadrave. Një fitore për secilën prej tyre do ta bënte zyrtarisht ekipin kandidat për titullin kampion, si dhe rivalin më të fortë të Skënderbeut. Vlonjatët nuk duan ta përmendin fjalën titull, por t'i marrin ndeshjet me radhë dhe të shohin se ku mund të mbërrijnë. Nga ana tjetër, Kukësi kërkon të mbrojë titullin e fituar vitin e kaluar. Dhe për ta fituar këtë sfidë, vëmendja maksimale është te sulmuesit Bushiç dhe Bakaj. Duelin e hekurt në Vlorë mund ta vendosë faktori "B".

GOLEADORË - Një sfidë brenda sfidës, ajo mes Tomislav Bushiçit dhe Elis Bakajt. Të dy lojtarët udhëheqin renditjen e golashënuesve të Kategorisë Superiore me pesë dhe gjashtë gola (edhe Lilaj ka 5). Kapiteni i Flamurtarit është ndalur në kuotën e 5 golave, pavarësisht se në javët e para ishte ai golashënuesi i kampionatit. Bushiç ka një fakt shumë interesant sepse sa herë shënon ai, skuadra e Flamurtarit nuk humbet. Deri tani golat e tij kanë ardhur: 1 në fitoren me Lushnjën (3-1), 2 në triumfin me Teutën (1-2), 1 me Vllazninë ( 1- 1), 1 me Laçin (1-1). Prej këtyre 5 golave, asnjërin nuk e ka shënuar me penallti. Bushiç duket i rilindur këtë sezon dhe po kalon një nga momentet më të mira që nga koha kur ka ardhur në Shqipëri. Nga ana tjetër, Elis Bakaj është kryegolashënuesi i kampionatit. Pavarësisht se luan disi më i tërhequr, kjo nuk e ka penguar që ta dërgojë topin në rrjetë 6 herë. Tre gola i ka shënuar me penallti në ndeshjet (Luftëtari 0-3 Kukësi ku shënoi dopietë, Kukësi 1- 2 Skënderbeu, Kukësi 1-0 Kamza) dhe tre të tjerë në Kukësi 4- 2 Teuta, Kukësi 3-0 Laçi. Eksperienca e tij është shumë e vlefshme për verilindorët, të cilët i kanë sytë nga ai për të arritur një rezultat pozitiv në Vlorë.