Sfidë për Superioren, Besëlidhja shfaq ‘muskujt’
Ndreca: Jemi në superformë, kjo ndeshje vlen shumë
Lezhjanët e Besëlidhjes janë në kulmin e përgatitjeve në kuadër të javës së shtatë të kampionatit, ku kalendari iu ka rezervuar supersfidën e javës dhe të fazës. Skuadra do të luajë në transfertën e Krujës ndaj Kastriotit. Një përballje mes dy prej pretendenteve për t'u ngjitur në Superiore. Pas një nisjeje jo shumë të mirë të kampionatit, lezhjanët tashmë po kalojnë një formë të mirë dhe i janë afruar ndjeshëm vendit të parë. Diferenca mes Kastriotit të vendit të parë dhe Besëlidhjes që renditet e treta është tri pikë. Një fitore e lezhjanëve në transfertë, do të bënte që skuadrat të barazoheshin me pikë në krye të klasifikimit. Në këtë mënyrë, kjo ndeshje që mund të vendosë shumë për të ardhmen e të dy ekipeve, është vlerësuar maksimalisht.
NDRECA - Mbrojtësi i majtë, kurbinasi Edison Ndreca, është optimist për sfidën ndaj Kastriotit. Këtë e shpreh edhe gjatë një bisede për "Panorama Sport" duke thënë: "Në fundjavë na pret një transfertë shumë e vështirë, por jo e pamundur, pasi do të përballemi me kreun aty ku synojmë të mbërrijmë edhe ne. Falë dy fitoreve të fundit ia dolëm që të jemi vetëm tri pikë larg Kastriotit, çka na e ka rritur oreksin për fitore. Për të shkuar deri te suksesi, na duhet që edhe këto ditët e mbetura stërvitore t'i shfrytëzojmë maksimalisht për të minimizuar sa më shumë defektet e vërejtura gjatë rrugës deri këtu. Stafi teknik po punon me ne pa u lodhur për të na karikuar maksimalisht brenda aftësive tona nga të gjitha pikëpamjet. Kjo, për
të pasur adrenalinën në maksimum gjatë të gjithë ndeshjes deri në sekondat e fundit, që të jemi superiorë përballë kundërshtarit. Ndaj Kastriotit do të luajmë lojën tonë, ndërsa rezultatin le ta prodhojë fusha. Cila skuadër do të gabojë më pak do të fitojë,
kjo është edhe filozofia e dy skuadrave, që janë profesioniste përballë njëra-tjetrës", tha mbrojtësi i majtë i Besëlidhjes, Edison Ndreca. Takimi do të luhet nesër në orën 14:00 në Krujë dhe do të transmetohet "live" në rrjetin e Televizionit Publik Shqiptar.