Fusha mban peng Tomorin, kompletohet skuadra
Djemtë e Dules kërkojnë fitoren në “derbin” ndaj Apolonisë
Tapeti mban "peng" Tomorin. Duket se skuadra beratase do të duhet të presë edhe disa javë përpara se të rikthehet të luajë në stadiumin e vetë. Vetëm gjashtë shirita me bar artificial, të cilat ende nuk kanë mbërritur në Berat, mbajnë "peng" ekipin. Një pjesë e mirë e tapetit është shtruar, por mungon në një pjesë dhe kjo ka bërë që ekipi të vazhdojë të luajë në stadiumin e Kuçovës. NGËRÇI
Rikonstruksioni i stadiumit dhe ndërrimi i tapetit të vjetër, që ishte në një gjendje skandaloze, nisi që sezonin e kaluar. Ambientet e stadiumit u kthyen në një gjendje normale, ndërsa duket se impianti ka marrë një pamje tjetër. Gjithashtu, u vendos që tapeti i ri të ishte me bar artificial, i cili është më jetëgjatë se ai me bar natyral. Mbërritja e tapetit nga jashtë dhe nisja e shtrimit të tij u shty në kohë. Në këtë mënyrë, Tomori u detyra që ta niste kampionatin duke i luajtur ndeshjet si pritës në Kuçovë. Drejtuesit shpresonin shumë që shtrimi i tapetit të përfundonte përpara ndeshjes me Tiranën dhe ky takim të luhej në Berat. Por, kjo nuk u bë e pamundur dhe në këtë mënyrë skuadra luajti në stadiumin e Kuçovës. Ndërsa, një pjesë e mirë e tapetit është shtruar tashmë, ndërsa kanë mbetur ende edhe gjashtë shirita. Duket e vështirë që Tomori të rikthehet në Berat në sfidën e pas dy javëve. Drejtuesit kanë bërë të ditur se do të bëjnë gjithçka që ekipi të rikthehet të luajë në stadiumin e vet sa më shpejt, por duket se do të presë edhe disa javë. Ndërkaq, tifozët presin me pa durim që të shohin ekipin e tyre të zemrës në Berat. SKUADRA
Ndërkaq, ekipi vazhdon normalisht përgatitjet për ndeshjen e radhës që do të luajë nesër në transfertën e Fierit. Beratasit do të përballen me Apoloninë në një ndeshje shumë të vështirë. Takimi do të luhet nesër në orën 13: 00, ndërsa trajneri Santiliano Dule do të ketë në dispozicion të gjithë futbollistët, pasi edhe ata që ishin të pezulluar, janë rikthyer.