Spaleti: Mos më krahasoni me Murinjon
“Murinjo bëri skulpturën, unë sapo e kam marrë daltën...”
Luçiano Spaleti nuk do të ndalet. Interi i tij (në vendin e dytë) ndjek Napolin, është ende i pamposhtur dhe sot do të përballet me Torinon me qëllim për të mbajtur hapin e kreut, pas fitores me rezultat të ngushtë në Veronë. Nga "Suning Training Centre", trajneri i zikaltërve ka marrë fjalën në konferencën për shtyp të ditës së djeshme, duke folur menjëherë për hipotezën "titull": "Më mirë të tregohemi të kujdesshëm, por disa situata ku mund të flasim për një skuadër me personalitet janë të qarta. Në rastet e vështira kam parë reagimin e lojtarëve. Karakteristikë thelbësore për të përballur Torinon e Mihajloviçit. Duhen personalitete të forta për t'u ndeshur me vështirësitë e kampionatit". Sot në "San Siro" priten më shumë se 70 mijë spektatorë: "Më vjen mirë t'i ndiej pranë dhe na pëlqen shtysa që na japin. Është një tjetër tregues i besimit të tyre dhe ne duhet të dimë se si të përfitojmë. Rrathët e 'San Siro'-s janë si unaza që shfaqin dashurinë për Interin". Krahasimet e vazhdueshme me Murinjon nuk i japin kënaqësi Luçianos: "Unë nuk e shoh veten në atë nivel, Mou me Interin fitoi gjithçka, ndërtoi një skulpturë. Unë për momentin sapo kam nisur të përdor daltën...".
INTER MË SULMUES - I nxitur për rrugëtimin e Interit të tij dhe për përdorimin e një sulmuesi të dytë përkrah
Ikardit, Spaleti ngutet: "Mund të qëndrojë si mundësi, ndoshta një lojtar si Eder. Ai di të bëjë tri role dhe të gjitha shumë mirë. Klubi më parapriu, doja ta zgjasja unë kontratën e tij... Megjithatë duhet të merret diçka në konsideratë: nëse kështu si jemi
po shkojmë në rrugën e duhur, përse ta deformojmë skuadrën?".
TORINO - "Distancat e skuadrës do të jenë thelbësore", shpjegoi Spaleti. "Merrni Belotin, për shembull, i cili është shumë i zoti në kundërlëvizje. Bashkë me Andrean, Torino
ka rigjetur edhe Ljajiç nga titullarët: janë të gjitha pengesa për ne, por duhet të matemi me këto vështirësi, jemi Interi dhe duhet të përpiqemi gjithmonë të fitojmë. Të njëjtët titullarë në javët e fundit? Kam mundësi të mëdha zgjedhjeje, por me shumë mundësi
Interi do të jetë ai".
MERKATO - "Merkato e varfër në janar? Një trajner jep rezultat nëse ka lojtarë cilësorë. Për momentin nuk dua të bëj ndryshime. Torreira? E kemi diskutuar, por për tani jam i lumtur me Galjardinin, Vesinon dhe të tjerët".