Luftëtari gjen fitoren, Teuta barazon me Laçin
antazisti Rro a shënon që nga "tuneli", ndërsa Rapo e vulos
Luftëtari gjen fitoren në kampionat pas rreth dy muajsh në krizë rezultatesh. Skuadra e Hasan Likës mposhti Lushnjën në Gjirokastër me shifrat 2-0, por edhe këtë herë shpërdoroi një mori rastesh për shënim. Nëse në ndeshjet e kaluara, loja e bukur nuk kishte munguar, këtë herë më shumë se kurrë duhej rezultati. Bluzinjtë e nisën ndeshjen me golin e Rrocës dhe arritën të dyfishonin shifrat në pjesën e dytë me të sapofuturin në fushë Rapo. Lushnja u mundua të godiste gjirokastritët me goditjet standarde dhe topat e gjatë te sulmuesi Fation Sefa, por ishte shumë larg asaj që pretendonte. Trajneri Hysen Dedja debutoi me humbje, ndërsa për Hasan Likën, kjo ishte fitorja e parë në krye të pankinës bluzi. Tetë pikë në 9 ndeshje të fazës së parë janë pak për një ekip si Luftëtari, që pretendon të mos jetë në vorbullën e skuadrave që këtë sezon do të luftojnë për mbijetesë.
PJESA E PARË
Rritëm i lartë që në start, me Lushnjën që rrezikon me Sefën dhe menjëherë më pas Luftëtari e shikon veten në avantazh. Një gabim në mbrojtje i lagunarëve bën që Rroca të përfitojë, duke shënuar golin e parë. Avantazhi i shpejtë u jep siguri gjirokastritëve, që nuk rreshtin së insistuari për të dyfishuar rezultatin. Bregu tenton me goditje nga jashtë zone, ndërsa mbrojtësi Zeqaj i afrohet golit pas një goditjeje me kokë. Më pas është Canka, i cili i afrohet barazimit, por është Ruçi që shpëton Luftëtarin. Loja ekuilibrohet ndjeshëm, por me vendësit që janë më të rrezikshëm. Aleksi dhe Rroca rrezikojnë portën e Spahos, ndërsa Abazaj shpërdoron fatalisht. Pjesa e parë mbyllet me një rast tjetër flagrant, këtë herë nga Pepa i Lushnjës.
PJESA E DYTË
Pas pushimit skuadrat e nisin me të njëjtat formacione. Lushnja mundohet të shtyjë përpara, por e ka të vështirë të organizohet. Loja me topat e gjatë bëhet e lexueshme dhe me kalimin e minutave gjirokastritët fitojnë siguri, duke dalë rrezikshëm në kundërsulm. Lamçe humbet një rast ideal, po ashtu më pas edhe Abazaj e Rroca. Megjithatë, goli dukej çështje kohe dhe kështu ndodh. Pas një goditjeje dënimi, është Bregu që detyron Spahon të largojë një top në vijën fatale, por në vijimin e aksionit, Rapo merr një asist nga Rapa dhe dyfishon shifrat. Këtu mbyllet gjithçka, pasi miqtë nuk bëjnë asgjë për të rrezikuar portën e Ruçit. Madje është Bregu që i afrohet golit të tretë, pas një goditjeje nga jashtë zone. Në fund, gjyqtari akordon 4 minuta shtesë, nisur edhe nga fakti se ndërpreu lojën si pasojë e ofendimeve në kor nga grupimi "Delegatët", që mbështetën dje Lushnjën në stadiumin "Gjirokastra". Në javën tjetër, kur dhe nis faza e dytë, Luftëtari pret Teutën, ndërsa Lushnja luan në transfertë me Vllazninë.