Kompletohet Tomori, Kaloshi: Ju tregoj pezullimin

Klubi i Tomorit ka rikthyer gjatë kësaj jave në seancat stërvitore tre futbollistët e pezulluar, ndaj të cilëve u vendos një masë ndëshkimore për mosimpenjim në sfidën e javës së tretë ndaj Shkumbinit. Kohëzgjatja e tyre larg përgatitjeve dhe pjesës tjetër të lojtarëve ka qenë për gati 22 ditë, duke bërë që edhe alternativat të jenë më të pakta për skuadrën beratase ndaj Turbinës, Bylisit dhe Tiranës, të cilat tashmë janë kaluar.

KALOSHI - Portieri Mikel Kaloshi, si dhe dy mesfushorët Xhulio Mirani dhe Ariel Drabo janë parë mjaft të fokusuar te përgatitjet e kësaj jave. Por, vetëm për gardianin Kaloshi do të ketë një vend në 11-she. Në një prononcim për "Panorama Sport", portieri Kaloshi ka folur në lidhje me pezullimin dhe mënyrën sesi e ka përjetuar atë. Sakaq, 24-vjeçari ka komentuar edhe sfidën e sotme ndaj Apolonisë, ku beson se skuadra e tij do të tregohet e matur me skuadrën në fjalë dhe do të përpiqet të minimizojë gabimet. "E kam respektuar masën ndëshkimore që m'u dha nga klubi, pasi është një konceptim i tyre dhe jam i detyruar ta zbatoj përderisa ne kemi një kontratë me njëri-tjetrin. Në futboll ka ulje dhe ngritje, mirëpo e rëndësishme është që të rikthehesh më i fortë se kurrë për të vazhduar përpara dhe për të shkuar sa më lart të jetë e mundur. Ky penalizim ishte diçka që më ndodhi për herë të parë dhe realisht e kam përjetuar shumë keq. Megjithatë, dua ta fshij nga karriera ime këtë episod dhe të shikoj nga e ardhmja", u shpreh portieri Kaloshi. I pyetur në lidhje me ndeshjen e sotme ndaj Apolonisë, gardiani përgjigjet: "Është një transfertë e fortë, sepse fierakët janë një klub me tradita, por duke parë gjendjen e skuadrës sonë dhe grupin e plotë për këtë javë besoj se do të dalim me 3-pikëshin nga kjo përballje", përfundoi prononcimin e tij portieri i Tomorit, Mikel Kaloshi. Eris Sylyku