Panuçi grumbulloi Bashën e dëmtuar, jo Balajn e rikuperuar

Absurditeti me listën, Bari nuk e kishte dje në stol

Dy ditë më parë, Kristian Panuçi bëri publike listën e lojtarëve të grumbulluar për ndeshjen miqësore me Turqinë dhe ra në sy mungesa e futbollistëve sulmues, pavarësisht se italiani premtoi lojë ofensive. Vetëm Armando Sadiku është sulmues i deklaruar, ndërsa për këtë ndeshje nuk u thirr Bekim Balaj. Në kohët e fundit ka vuajtur nga një dëmtim, por duket se ka lënë pas gjithçka dhe ditën e djeshme ishte i grumbulluar nga ekipi i tij, Akhmat Grozni, pavarësisht se nuk pati minuta në fitoren e arritur kundër Rostovit. BASHA I DËMTUAR

Çudia më e madhe është që Panuçi ka grumbulluar për këtë sfidë miqësore një lojtar të dëmtuar si Migjen Basha, i cili ditën e djeshme nuk ka qenë pjesë e skuadrës së Barit për ndeshjen ndaj Salertinatës. Gjatë kësaj jave, ai nuk është stërvitur me skuadrën, por ka bërë vetëm terapi intensive. Megjithatë nuk ia doli të ishte i gatshëm për ndeshjen e djeshme. Kjo duket se nuk i ka bërë përshtypje trajnerit

Panuçi, i cili e ka grumbulluar. Ndoshta Basha do të grumbullohet dhe do t'u nënshtrohet kontrolleve nga mjekët e Kombëtares për t'u lënë më pas i lirë, ose ndoshta mund të rikuperohet në ditët që do të zhvillojë përgatitjet me kuqezinjtë.

Panuçi me të drejtë mund të thotë se ndeshja me Turqinë është thjesht një miqësore ku ai kërkon të eksperimentojë, por sigurisht që bie në sy fakti që grumbullohet një lojtar i dëmtuar dhe nuk thirret një lojtar që është rikuperuar plotësisht dhe po pret momentin e tij për të ndihmuar Kombëtaren shqiptare. E çuditshme është edhe mungesa e Kaçes, i cili u rikthye me bujë dhe ishte lojtari që shkëlqeu me Spanjën dhe Italinë, por Panuçi këtë herë ka vendosur ta lërë në shtëpi...