Skënderbeu “monstruoz”, Kukësi ngec në Vlorë
Flamurtari barazon me kampionët, incident me arbitrat pas ndeshjes
Skënderbeu vazhdon të bëjë detyrën në ka mpionat, teksa siguron edhe fitoren e 8- të në nëntë javë të luajtura, prej të cilave shtatë janë triumfe radhazi, si për të thënë se nuk dihet se kush mund ta ndalë këtë skuadër. 25 pikë në total në këtë fazë të parë, që u mbyll dje me shtatë pikë diferencë ndaj Kukësit ndjekës. Fitorja në Korçë nuk ishte fort e lehtë përballë një Vllaznie që bëri mirë në fushë, por pa arritur të surprizonte korçarët. Sfidë, e cila u zhvendos në Korçë me pranimin e shkodranëve dhe aprovimin e FSHF-së, por që në protokoll konsiderohet si ndeshje "brenda fushe" për kuqeblutë. Një lloj "vetëvrasjeje" për shkodranët, të cilët mund të shfrytëzonin formën e mirë dhe barazimin ndaj Kukësit. Mirëpo, kuqeblutë e bënë një gjë të tillë edhe gjatë ndeshjes, me rastet e shpërdoruara para portës së Shehit dhe pas nëntë javëve e gjejnë veten në vendin e 9-të me vetëm 1 pikë më shumë sesa Lushnja.
PJESA E PARË
Një Skënderbe i lodhur është parë dje në stadiumin "Skënderbeu", për faktin se të enjten korçarët luajtën ndaj Partizanit të Beogradit. Moment, të cilin nuk e shfrytëzuan dot shkodranët, të cilët dje ishin apatikë në vijën e parë të sulmit duke mos shfrytëzuar mundësitë përpara portës së Shehit. Me një ndryshim të vetëm nga Beogradi, trajneri i Skënderbeut, Ilir Daja kishte shmangur rrotacionin. Rastet e para i patën vendësit, të cilët rrezikuan dy herë në pak minuta lojë me anë të Taku dhe Xhejms, por pa arritur të ishin të saktë. Më pas loja zhvillohet më shumë në mesin e fushës, teksa korçarët duken të lodhur dhe shkodranët vazhdimisht të kënaqur me këtë ritëm. Për herë të parë në gjysmën e pjesës së parë miqtë do të vizitonin portën e Shehit, por pa rrezik serioz, ndërkohë që portieri shkodran në minutën e 28-të shpëton një rast të pastër. Asgjë për t'u shënuar deri në vërshëllimën e fundit të kësaj pjese të parë dhe të dy skuadrat futen në bardhësi në dhomat e zhveshjes. PJESA E DYTË
Ky fraksion nis me një zëvendësim të detyruar për
Skënderbeun, ku Jashanica dëmtohet që në fundin e të parës dhe i lë vendin Nimagës. Pak minuta më vonë, është edhe Radas që kërkon zëvendësim dhe në vend të tij aktivizohet Aliti. Goli i parë vjen në minutën e 57- të, teksa Taku bën
gjithçka mirë dhe kalon të tijtë në avantazh. Në fillim një pasim për Xhejmsin, por topi i ndërprerë shfrytëzohet më së miri nga vetë mesfushori që kalibron në këndin e kuadratit të Selimajt, për t'u dhënë avantazhin korçarëve. Pas golit, trajneri
Gjoka i kryhen brenda pak minutash të tri zëvendësimet, duke forcuar sulmin si shpresa e fundit për të marrë pikë nga kjo përballje. Por, pa rezultat, pasi Skënderbeu sulmon dhe qarkullon më shumë topin. Disa mundësi të shkodranëve për të barazuar sfidën, por në metrat e fundit, kuqeblutë nuk kishin saktësinë e duhur. Ali Soue, në fillim tregohet egoist në një aksion, ku një pasim për Xhejmsin mund të kishte vulosur takimin. Por, pesë minuta nga fundi, sulmuesi është me fat që gjen një top në mes të zonës pas devijimit të mbrojtësve dhe me një portë thuajse të boshatisur dhe e ka të lehtë të çojë shifrat në 0-2 në favor të korçarëve. Më tej, nuk ka më histori me Vllazninë që e gjen veten të dorëzuar dhe korçarët që morën tri pikë edhe pa qenë brilantë në fushën e blertë.