Goli i anuluar në Vlorë, arbitri veproi drejt
Polemikat në Vlorë? Rregullorja i jep të drejtë gjykimit
Kategoria Superiore ka mbyllur fazën e parë të saj me gjykime kryesisht korrekte në pesë ndeshjet e luajtura në dy ditë. Dy sfidat që kanë pasur raste të diskutueshme kanë qenë ato mes Luftëtarit e Lushnjës dhe Flamurtarit e Kukësit. Në takimin e parë, që u zhvillua të shtunën dhe kryesor ishte arbitri i kolegjiumit të Fierit, Sino, me dy raste të diskutueshme. Në të parin, që i takon minutës së 15-të, arbitri ka marrë vendim të drejtë, duke mos akorduar një penallti në favor të vendësve, pas një rrëzimi të Abazajt në zonën mike. Ky i fundit, ka pasur një kontakt me Monene e Lushnjës dhe ka pretenduar për 11- metërsh, por duket qartë se nuk kemi të bëjmë më një të tillë dhe vendimi i kryesorit për të vazhduar takimin ka qenë i drejtë. Ndërkohë, në momentin e dytë, në minutën e 68', arbitri duhej të kishte akorduar kartonin e dytë të verdhë për mbrojtësin e Lushnjës, Markun. Ky i fundit ka bërë një ndërhyrje të gabuar ndaj Abazajt, që duhej ndëshkuar. Ndërsa në ndeshjen tjetër mes Flamurtarit dhe Kukësit, kemi një gol të anuluar në minutat shtesë. Xhufo i Flamurtarit kroson nga goditja e dënimit një top që ndalet në rrjetë. Sfera nuk devijohet nga asnjë prej lojtarëve vlonjatë edhe pse ka tentativa. Por, anulimi i golit është bërë me të drejtë nga gjyqtari kryesor në bashkëpunim me arbitrin e linjës, pasi rregullorja e thotë qartë që: "Lojtari në pozicion jashtë loje konsiderohet kur: Ndikon te portieri, ose kur topi kalon shumë afër lojtarit që është në pozicion jashtë loje edhe pse nuk preket".