Zgjohet Milani, shpëton Montela
Vendosin Romanjoli dhe Suso me nga një gol për pjesë, Donaruma rikthehet super
Duhej fitore dhe kuqezinjtë e morën. Tri pikë të rënda për renditjen, por edhe për Montelën, i cili mund të punojë më i qetë gjatë pauzës së kombëtareve. Milani vërteton edhe një herë varësinë ndaj Susos. Është spanjolli njeriu që merr për dore skuadrën në vështirësi, teksa Bonuçi tregon rritje të mëtejshme në paraqitjet e tij.
PJESA E PARË
Montela tenton fitoren ndaj makthit Sasuolo duke propozuar dy fantazistë pas shpinës së Kaliniç, që zhgënjen ende me fanellën e "Djallit". Kuqezinjtë kanë presionin e rezultatit dhe luajnë me kujdes, ndërsa Sasuolo përfiton duke nisur sfidën me ide të qarta dhe intensitet. Kur kanë kaluar vetëm dhjetë minuta lojë, Montela detyrohet të bëjë zëvendësimin e parë kur vendin e të dëmtuarit Kalabria e merr Abate. Maxiteli është rreziku numër 1 te zigjelbrit, por takimin e tij me golin e prish në dy raste Donaruma, i cili rikthehet në portierin e mrekullive të një sezoni më parë. Me Sasulon që përpiqet të shfrytëzojë çdo top në zonën kuqezi, është Milani që përfiton. Kaliniç përballë Konsiljit hipnotizohet duke mos përfituar për të shënuar me kokë. Nga goditja e këndit zhvillohet një aksion, me Çalhanoglunë që kroson në zonë, ku Romanjoli kërcen më lart se portieri vendës dhe i jep skuadrës golin e avantazhit. Ndalesat e shumta detyrojnë arbitrin Damato të akordojë tre minuta shtesë, të cilat gjithsesi nuk sjellin asnjë ndryshim në rezultat.
PJESA E DYTË
Kuqezinjtë e nisin më të çliruar 45- minutëshin e dytë, të favorizuar edhe nga avantazhi. Mungesa e përqendrimit e ankuar nga Montela del në pah dhe për 15 minuta janë vendësit të rrezikojnë me Bonuçin dhe Donarumën që u duhet të bëjnë disa ndërhyrje shtesë për të larguar rreziqet. Ashtu si në pjesën e parë, në momentin më të mirë të Sasuolos përfiton Milani që, me anë të Kesit, i afrohet golit të dytë, por është sërish Konsilji që u mohon kënaqësinë kuqezinjve. Me Çalhanoglunë të zëvendësuar nga Lokateli, është Borini që vendos të bëjë fantazistin. Sulmuesi i palodhur lëshon një pasim të gjatë për Suson që, pasi kontrollon topin, futet në zonë dhe godet fort në këndin
më të largët. Portieri vendës tenton mrekullinë e radhës, por nuk ndal dot goditjen e spanjollit. Kuqezinjtë nuk e ulin ritmin dhe përpiqen të thellojnë rezultatin pa rrezikuar shumë. Sasuolo duket e dorëzuar me Montelën dhe
të tijtë që shijojnë një tjetër fitore në transfertë. Tri pikë për qetësi, renditje dhe moral, në pritje të sfidës ndaj Napolit pas dy javësh. Montela e mbajti fjalën, fitoi dhe do të jetë në konferencë për sfidën ndaj kryesuesve të Serisë A.